December 5, 2023; ZPM sawrkar thar a piang dawn a, an inpuahchah mek. Minister te hna chanpual tur rinthu thlengin a darh mek a, tak tak emaw ti pawh an awm, rinthu mai a la ni rih e.

ZPM kaihhruai sawrkar thar hi December ni 8, 2023 ah, Mizoram Larsap chenna Raj Bhavan ah lakluh a la ni chauh dawn. Chumi zawhah tute nge minister ni ang a, engnge an hna chanpual tur tih a hriat theih chauh ang.

Result puan fel a la nih chauh avangin rinthu tarlan mai an la ni rih a, hetihlai hian dik a mual mual pawh chu awm thei a ni tho, rin dik palh theih a nih ve tho avangin.

ZALEN pawhin zawhna a dawng nual a, minister tur leh an hna chanpual tur hi engmah chiang hriat theih a la ni lo. Chiang awm chhun hriat theih rih chu...Chief Minister tur a ni...chu chu LALDUHOMA a ni e, a bak chu sawrkar thar lakluh zawhah chiang zawkin hriat theih a ni chauh ang.