February 27, 2023; Vawiin Assembly Budget Session a minister te demand sawihona ah Dampa bialtu MLA leh Serchhip bialtu MLA Lalduhoma te chief miniser Zoramthangan thubuai a neih leh neih loh an an inhnial a, ngaihdam dil turin an inphut a, MLA atanga ban thlengin sawi rik a ni.
 
Dampa bialtu MLA Lalrintluanga Sailo chuan ni Zirtawpni a private member resolution sawihona ah Serchhip bialtu MLA zahawm takin chief minister Zoramthanga chu thubuai nei niin a sawi tih a tarlang a, a ngaih thutak thu tarlangin, "Calling attention motion putluh hial ka duh a, mahse programme dang pawn lamah ka neih avangin ka ti hman ta lo," a ti. 

"IPS officer niin kum 6 zenzawn police hna lo thawktawh a ni a, case nei leh nei lo chu a chiang turah ka ngai. A sawi dik lo a nih chuan house ah ngaihdam a dil ka phut a ni," ti bawkin, demand a khaikhawm hunah chumi chungchang sawifiah turin home minister a ngen nghal bawk. 

Serchhip bialtu MLA Lalduhoma chuan, CM in thubuai a lo nei a nih chuan Dampa bialtu MLA zahawm tak hian thupha a chawi ve ngam a ngem, ngaihdam a dil ngam a engem tih a zawt a, chu chu chhangin, Lalrintluanga Sailo chuan, "Thubuai a lo nei a nih chuan ngaihdam dil mai ni loin, ka bang ngam ang," a ti.

Lalduhoma chuan Mizoram First Movement ten April 11, 2022 ah Lok Ayukta ah CM lakah case an file tih a sawi a,  Lok Ayukta hi Autonomous body a nih thu te, home department hnuaia awm a nih loh thute a sawi. "Mi'n chutah chuan complaint an thehlut a, investifation a kal mek a, chubaka thubuai nei awm chuang," a ti bawk. 

Member pahnihte inhnialna chungchangah Deputy Speaker H. Biakzauva chuan, CM in thubuai a neih thu official in khawiah mah hriatna a awm a hriat loh thu a sawi a, enquiry kal mek chu case a tlin loh thu a sawi. 

"Enquiry a kal ang a, case puitling a an la dawn a nih chuan case an register thei ang a, tunah chuan case a neih dawn leh dawn loh enquiry an la mek chauh a ni. A sawifiah thei home minister in a demand a khaikhawmna ah ngentu an awm avangin la sawifiah se a tha ang," a ti bawk.