Kan hriat theuh angin HSSLC Examination result a lo chhuak a, kan lawmna au aw a reh fel ruala kan hriat leh hmasak chu College admission harsatna hi a ni awm e. Statistic lam atanga a lan dan chuan Sorkar enkawl Higher secondary school ringawt hi Mizoramah 95 (vel) a awm a, Degree College kan tih mai hi Mizoramah 21 a awm thung, chung zinga college 9 te chu Aizawl khawpui a awm an ni. Tun tum pawl 12 exam beitute atang khan sikul naupang 8400-in an pass a, heng pass chhuak atang hian admission nei tawh mi 4085. Tuna zirlai pawl (MZP) hnena admission chungchanga harsatna nei nia inhriattirte chu mi 572 an ni thung. (A dang admission la ti si lo harsatna thlen ve lem lote hi chu hmun danga zirna chhunzawm turte leh chhan dang avang te a ni mahna). Zep nak emaw, kan harsatna tawhna chhan bul ber chu college admission chang lo hrim hrim ni lovin Aizawla college luh duh si mahse an result-in a zir loh avang te leh Aizawl college 9 ten an duh zat leh an tlin tawk nia an ngaih zat an neih tawh vang a ni ber awm e. Chumi chianna chu, District headquarters danga kan college-te hian admission a harsatna an tawh thu tun dinhmun engmah sawi an nei lo tlat. Hetih lai hian Aizawla college lian leh hlun thenkhatten an college-a lut thei tur chu bituk neiin an tih that dan azirin dil thei leh thei lo, Cut-off mark siamin an lo thliar si a, hei hi thil tih phung lo leh mi tih loh dan a ni bik lo. Ram changkang apiangah college tha seat chan a har a, lut tur hian ralpui phiara phiar a ngai tak zet zet a ni. Keini ram pawh hian College tha bik leh zirlai tam takin luh an tumna leh luh an chakna bik kan neih hi a tul a, zirlaiten chutianga luh tum chuan a hma atanga lo inbuatsaihin competitiveness nasa tak an lo neih phah bawk ang a, thil tha tak a hring chhuak awm e. Hetia ngaih mai chuan zirlai naupangte hian an result leh an mark hmuh mila an tum tawk college an pan mai hi buaina chinfelna awlsam chu a nih hmel. Chutih rual erawh chuan Zirlai pawlten an zirlaipui harsatna tawkte an lo tanpui a, an manganna sutkiansak an tum hi an tih tur awm reng a ni. Satistic kan en let chuan kan Higher secondary school sorkar emaw Private emaw a tam zawk hi chuan Aizawl khawpui college hi an chawmrawn deuh ber tihna a nih hmel a, heti taka chawmtu (feeder) an ngah avang hian kan khawpui college-te hian an hmunhma leh zirtirtu lam zawh loh thleng khawp admission an neih a tul dawn a nih hmel. Zirlai pawl leh Higher &Technical Education hotute leh khawpui College hrang hrang Principal te inrawn khawmnaah khan college thenkhat chuan admission an lakbelh leh theih tur thu an sawi a, chutih rualin lakbelh leh thei tawh lo tur college pawh an awm a, harsatna nei mi 500 chuang atang hian zirlai 150 bawr vel bakin seat an hmuh belh theih dawn loh avangin thu mum awm loin an sawihona hi an tin hrih ni awm tak a ni. Hetiang harsatna hi kan hmachhawn vawi khatna a ni lo va, kan la tawk zel dawn ni pawhin a lang. Zirlai pawl lamte pawh hian a kum leh atana inhmakhuain Sorkarah hian District headquarter hrang hranga kan college-te hi a huam chin district chhunga Higher secondary school tana belhtlak leh changtlung zawka thuam tura an dilpuite pawh a tha awm e (an hmalak mek lai chu a ni ngei ang a. Tin, tun dinhmunah district hrang hrang kan college-te hi subject thenkhatah zirtirtu indaih lo an awm zeuh zeuh tih loh chu a tha tawk viau a tih theih awm e). Hei bakah hian hmun danga kan college-te hi a that tawk loh vang lam aiin Aizawla awm chakna (Urbanization) vangin khawpui kan bawh a. Hei hi chu ram tin leh hmun tina harsatna thlenga tih theih awm e, Aizawla zir thin pawhin Vairam lamah heta zir ve theih tho kha harsa harsain kan zuk um a, environment thlak ve duh hrim hrim tawh nu leh pa tamtak leh zirlai tam takin Aizawla college kal kher an ti pawh hi an demawm tehchiam lo ve, chutih rual erawh chuan ram changkangte angin remchanna kawng dang (opportunity) kan neih tehchiam loh avangin zirna tluang hi kan vai zawh dual dual hrih lo thei lo a tih theih bawk awm e. — HRUAIA KAWLNI, Chanmari, Aizawl