Aizawl; Higher & Technical Education (H&TE) minister Dr. R. Lalthangliana chuan College admission fee chungchang ah ngaihtuahna sen mek a ni tih ZALEN hrilhin, department dangte nen inrawn zau a ngaih vangin thutlukna siam a la nih loh thu a sawi.

H&TE minister chuan tunhnai khan Mizoram University Vice- Chancellor leh Mizoram chhunga College hrang hrang Principal te chu lehkha thawnin, kum 20201-22 academic session atan seat siam belh turin a lo ngen tawh a, minister chuan zirlaiten zirna sang zawk an chhunzawm theihna tura seat siam belh dan tur kawng dap turin a ngen a ni.

ZALEN thudawn danin tunlai hian College hrang hrang ten online in admission an ti mek a, hemi chungchangah hian ZALEN zawhna chhangin H&TE minister chuan admission fee ah ngaihtuahna an sen mek thu leh thutlukna erawh siam fel a la nih loh thu a sawi.

Hetihlai hian Aizawl N-II bialtu MLA Dr. Vanlalthlana chuan June 24, 2021 khan an biala College pahnih, Govt. Zirtiri Residential Science College leh Govt. Aizawl North College te tlawhin, an bial chhunga zirlai, college zir zawm duh, admission fee a harsatna nei zirlai 39 te admission fee chu MLA fund atangin a lo pek sak tawh.

Mizoram Board of School Education (MBSE) in June ni 18 a HSSLC, Examination 2021 result a tih chhuah ah zirlai pass thar, mi 10,089 an awm a, chung zing a zirai tam ber te chu Mizoram chhung college hrang hranga zirna chhunzawm tur an ni.

Hripui leng mek leh inkharkhip avanga mipui harsatna chhawk zangkhai nan sawrkar school bakah, sawrkarin zirtirtu hlawh leh tanpuina a pek Higher Secondary School ah te pawl 11 admission fee 30% a tihhniam a nih thu School Education minister Lalchhandama Ralte chuan a lo puang tawh a ni.