Fiamthu thiam zawnna LPS Comedian Search 2023 chu Zirtawpni zan khan zawh fel a ni ta a, Vanmalsawma, Tuikual North  chu pakhatna a ni. Pahnihna chu Zohmangaiha, Champhai Ruantlang a ni, Lalchhanhima, Sesawng chu pathumna a ni. 

Grand finale chu
Grand finale-ah hian contestant te hian minute 5 theuh fiamthu thawhna hun an nei a, an che tha tlang hle. Minute 5 theuh fiamthu an thawh zawh hian pawh fuh a awm leh a, an thupui pawh chu minute 2 chhung sawi belhna hun pek leh an ni. Hetah pawh hian an che tha hlawm viau a, che chhe fal an awm lo tih theih a ni. 

Intihsiak an nih miau avangin a tha ber thlan chhuah a ngai si a, a tawpah Tuikual North mipui an hlim ta ber a ni. Vanmalsawma hi a tir atangin a langsar ber a ni ngai lo a, amaherawhchu, a tlo hle thung. A phu ang ngeiin pakhatna a ni a, a lawmpuiawm hle a ni. 

Lawmman
Comedian Search 2023 hi August 17 khan tan a ni a, mi 70 chuangin intihsiak an hmachhawn. Audition round atangin boruak a hot chho nghal a, a tawp thengin Zoram mipui titi a tling. Top 5 te hian September 16 zan khan final first leh an lo nei tawh a, Grand Finale zana an result nen belhkhawm a ni - a pumpuiah Vanmalsawma tluk zo an awm lo. 

Comedian Search winner hian pawisa fai Rs. 1 lakh bakah Suzuki Access 125, TV, 1.6 KW Solar Hybrid Power Backup Sysytem te a dawng a, a pawisa ang zawng phei chuan a tam tham hle. Pahnihna pawn Rs. 50,000, Refrigerator leh Solar Heater te a dawng dawn a, pathumna hnenah Rs. 30,000 Washing Machine leh Solar Heater te hlan a ni bawk ang. 

Sulhnu ropui
LPS Comedian Search hian ngaihhlut a hlawh hle a, Mizo ten reality show kan neih zingah pawh a kum hlun ber zinga mi a ni. Tunah hian Kum 2008 khan bultan niin, Covid-19 hrileng vanga kum 2020-a an awl bak kha chu kumtin an la tihlawhting thei a ni. Comedian Search hi Mizorama TV Show kaltlung rei ber a ni mek a, kumin hi a kum 15-na a ni. 

Comedian Search 2023 Result 
1. Vanmalsawma, Tuikual North 
2. Zohmangaiha, Champhai Ruantlang
3. Lalchhanhima, Sesawng

Lawmman
Pakhatna - Rs. 1,00,000 + thil pek
Pahnihna - Rs. 50,000 + thil pek
Pathumna - Rs. 30,000 + thil pek