Commonwealth Games 2022 neih mekah Australian singer leh swimmer ni bawk Cody Simpson chuan Gold medal a hlawh chhuak. Kum 25 mi hian mipa 4x100m freestyle-ah an ram tan medal hlu tak a la a, a ropuina belhchhahin a awm leh ta. 

Australian all-rounder an tih mai Cody Robert Simpson hian studio album pali - Paradise (2012), Surfers Paradise (2013), Free (2015) leh Cody Simpson (2022) te a tichhuak tawh a, rimawi lamah hming a chher tluk zet hian infiamna lamah pawh talent a nei tha tih a pholang. Birmingham, England-a infiamna kutpui neih mekah pawh mipui mitfukna a ni a, an ram chawimawiin Gold hial a hlawh chhuak ta a ni. 

Simpson hi 2017 khan Buckingham Palace-ah Queen Baton Relay-ah a lo inlan tawh a, Commonwealth Games-a inlan tur hian kumin May thla khan Australian Swimming Championships-ah a lo inan tawh bawk. Sport leh music a kal kawppui thei hi a ropuina chu a ni. Infiamna lam hlamchhiah chung si loin rimawi lamah nasa takin hming a chher bawk - Simpson hian 2012 khan a single hmasa ber 'On My Mind' a tichhuak. 

Kum 2012 khan a studio album hmasa ber 'Paradise' a tichhuak a, kumin April thla khan hla 12 awmna leh a studio album palina ni bawk 'Cody Simpson' chu a tichhuak leh bawk. Simpson hian album pali a tichhuak tawh a, music video phei chu 17 zet a siam tawh. EP pakua leh single 21 a nei tawh bawk a, an ramah chuan thalaite ngaihsan ber pakhat a ni mek. American singer Miley Cyrus nen pawh an lo inkawp tawh thin.