ZALEN Oct 4, 2024; Thenzawl Venghlun-a cheng Joseph VL Ruatpuia s/o B Lalrochuanga (L) chu scholarship hmingthang tak, Commonwealth Split - Site scholarship 2024 dawng tura thlan a ni.

Joseph VL Ruatpuia hi Department of Chemistry, National Institute of Technology, Silchar-a PhD zirlai mek a ni a, he scholarship a hmuh tur hmang hian Department of Chemistry, Cambridge University, UK-ah thla 12 chhung research a chhunzawm thei dawn a, Cambridge University-ah hian Prof. Andrew EH Wheatley hnuaiah research a ti ang.

Commonwealth Split - site Scholarship hi Doctoral candidate danglam bik, an background thliar lo a talent ropui leh theihna sang tak nei te hnenah pek thin a ni a, UK foreign, Commonwealth and Development Office (FCDO) atanga sum pek chhuah he scholarship hian history ropui tak neiin, kum 1959-a din a nih atangin Commonwealth Scholarship emaw, fellowship emaw hi researcher leh fellow 31,000 chuang zetin an dawng tawh a ni.