ZALEN June 30, 2025 : National Health Mission (NHM) chuan Mamit atanga dialysis khawl Serchhip-a sawn a nih dan an sawifiah a, Mamit District Hospital lam inpeih hunah Dialysis khawl bun nghal thei turin tun atang hian inbuatsaih mek a ni, an ti.

National Health Mission (NHM) chuan Pradhan Mantri National Dialysis Program (PMNDP) a awm a. He program-in a thil tumte zinga pakhat chu - district tina dialysis centre din a, dialysis vanga mipuite sum sen tih tlem a ni. Mizoram pawhin hemi bawhzui hian district tin (district thar pathum tel rih lovin)-ah dialysis centre din tumin hma a la mek a. Aizawl leh Lunglei-ah chauh dialysis centre awm thin kha he hmalakna avang hian Champhai leh Kolasib-ah te dialysis centre din belh a ni tawh a. Mamit, Siaha leh Lawngtlai-ah te pawh centre din belh turin hmalak a ni an ti.

Mamit tana khawl pali kan dawnte pawh hi building hluiah hmun a awm loh vangin building thar luah huna install tura ruahman a ni a. Kumin March thla khan kan donor-te hian rawn deliver a, install nghal an duh tawh a. Amaherawhchu, Mamit District Hospital building thar hi luah hman a nih tak loh avangin June 15, 2025 thleng nghah min phalsak a ni.

Dialysis khawl min petu donor-te hian Installation Report leh Utilisation Certificate an thehluh a ngaih tawh avangin Mamit-a khawl install lohva awm reng chu district dang, install theih nghalna hmunah dah sawn (relocate) rih mai turin an rawn tih angin, a hmunhma peih sa vek tawh Champhai leh Serchhip-ah te dah mai turin ruahmanna siam a ni, an ti.

Donor atanga lehkha an dawnah chuan, dialysis khawl pekte hi July 5, 2025 aia tlai lovah install ngei ngei tura tih an ni a, install theih loh chhan chhuanlam neih a thiang tawh lo tih pawh an rawn ziak chiang bawk (document attached). Chuvangin, July 5, 2025 hma hi chuan Mamit District Hospital-ah hian dialysis khawl bun hman ngaihna a awm tawh loh avangin, district dang, khawl bun nghal theihna hmunah Mamit District Hospital tana lo tih tawh khawlte hi sawna install mai a ngai ta a ni. Hei hi Mamit District mipuite leh NGO hrang hrangte pawhin min hriatthiampui a ngai a, min hriattthiampui turin an ngen a ni.

Mamit District Hospital-ah hian Dialysis Centre din ngei tura hmalak zel a ni a, heta hman tur RO plant pawh Health department chuan Mamit-ah dah tawhin, reprocessor machine pawh lei mek a ni. Tin, dialysis khawl pawh hi CSR atangin dil leh nghal a ni. Mamit District Hospital lam inpeih hunah Dialysis khawl bun nghal thei turin tun atang hian inbuatsaih mek a ni, an ti bawk.