Kum 35 mi, Arsenal, Chelsea leh Barcelona star hlui Cesc Fabregas chuan June thla khan Monaco a chhuahsan hnuah free agent niin Italian Serie B club Como a zawm.   

    * Cesc Fabregas leh Serie B club hian kum hnih atan inremna an nei.
    * Arsenal leh Chelsea star thin Fabregas hi Monaco atanga a chhuah hnu khan free agent niin lei ngai lovin a duh club a zawm thei. 
    * Fabregas-a hian club hrang hrang panga zetah khel kual tawh mahse Italy rama a vawi khat khelhna tur a ni.
    
Fabregas chuan,"Como 1907 ka zawm thei hi chawimawina a nih piah lamah hlimna min thlentu a ni. Club ropui taka khelh theihna hun tha tak ka nei hi ka vannei tak zet zet a ni. Mirwan, Dennis leh Charlie ten football lama an hmathlir min hrilh tak tak mai chu, Como hi ka tan chuan hnawl mi a ni lo. 

Fabregas-a club thar Como hi 2020-21 season khan Serie B khel turin an inpet tling a, season liamta khan Serie B-ah 13-na an ni phak nghal der a, an hmachhawpah chuan kum thum hnuah an ram league sang ber Serie A kai hman ngei an tum a ni. 

Spanish midfielder Fabregas hian Arsenal-ah  kum 2003 khan bul a tan a, Arsenal atang hian Barcelona-ah insuanin, kum 2014 khan Chelsea-ah a lut. kum 5 hnuah AS Monaco a zawm leh bawk. Arsenal, Chelsea leh Barcelona player hlui hian trophy hlu tak tak 13 zet a chawi tawh a, chung zingah chuan Premier League, FA Cup, La Liga leh Europa League te an tel. A ram Spain tan tum 110 khel tawhin European Championship tum hnih leh World Cup-ah a champion tawh bawk.