Aizawl March 22, 2024 : Vawiin khan Congress Vice President Lalnunmawia Chuaungo chuan chanchinthar lakhawmtute a hmachhawn a, an party inthlanah nasa takin inbei mah se, tunah chuan an intuamdam tawh niin a sawi a, Lok Sabha inthlan atan Congress leh a thawhpui INDIA Alliance an ring tawk.

Congress Vice President chuan Central-a BJP sawrkar mek chuan Lok Sabha inthlan lo awm turah tlin ngei tumin hmanraw chitin reng hmangin tan a la an ti a, BJP ten media lian an thunun tlat avangin News channel atanga en ringawt chuan dinhmun tha takin an lang a ti a, chutihrualin Congress leh a thawhpui INDIA Alliance dinhmun chu a tha chho mek a ti a, chak ngei an inring tih a sawi. 2014 inthlan ang khan Congress chu a rawn dingchhuak leh ngei an beisei thu a sawi.

Lalnunmawia Chuaungo chuan an party inthlanah nasa takin party chhungah inbeihna awm mah se, tunah chuan an intuamdam tawh niin a sawi a, kha inthlana candidate tling zo lo pawla tang te pawh tun MP inthlan atana star campaigner te an ni leh tawh zawk tih a sawi.

MPCC Vice President chuan BJP te chuan Congress tan harsatna an siamsak tumin hma an la chho mek a ti a, CBI, Enforcement Director leh Income Tax Department te dik hlel taka hmanrua a hmangin BJP paihthla thei tura an ngaih Political Party leh Politician pawimawhte an bei mek a ni, a ti. Income Tax Department leh Enforcement Directorate diklo taka hmanrua a hmang a, INC sum hnar chhut chah sak a ni, a ti bawk.