Aizawl May 4, 2024 : Mizoram Preadesh Youth Congress Committee chuan dan lova Dubai-a thawntu tan zawk anga tan zawk anga a lang leh rem leh rem lova an thlavang a hauhsak chu a dik lo tiin ‘Agency neitu, chief minister te awmna veng dan bawhchhetute nen hian inzawmna thuk tak an lo nei em ni?’ an ti.

Vawiin khan Aizawl Press Club-ah chanchinbumite kawmin MPYCC General Secretary i/c GAD R.Lalhmingmawia chuan, “Chief minister-in, ‘Mizoram Private Placement Agencies (Regulation) Act , 2015 hi a felhlel, a bilh a tho lo’ tia a sawi leh ‘Beyond the boundaries of Mizoram tih la vawnga ‘Placement agency-ten Mizoram pawn khawi hmunah pawh hna thawk turin thawnchhuah theihna an nei a; chuvangin, agency-te hian an duh duhna hmunah an thawn chhuak thei a, an thiam loh a ni bik lo, an sual vang a ni bik lo’ tia a sawi hi mak kan ti hle a ni,” a ti a. “Mizoram pawna placement an tih theih nan ‘Beyond the boundaries of Mizoram’ tiin Mizoram sawrkarin dan a lo siam zawk a. Chutih lai chuan India ram pawn, foreign-a hnathawktu tur thawn chhuaka placement tih chungchang erawh chu sawrkar laipui thu a ni a, Indian Constitution-a Seventh Schedule hnuaia Union list-a mi a ni. Mizoram sawrkarin thuneihna a nei lova dan pawh a siam thei lo,” a ti.

“India ram pawna hnathawktu thawnchhuak tur chuan Ministry of External Affairs hnuaia Protector General of Emigrants office-ah an in-register a, registration certificate an neih a ngai a. Chuvangin he dan hi a dikhlel, a bilha tho lo tih hi a dik lo,” a ti bawk.

MPYCC hruaitute chuan hmeichhia kum 18 pawh tling lo Dubai-a thawntute hian dan hi an bawhchhe ngei a. Hei bakah hian mi dang passport hmanga an kaltir lehzel hi dan bawhchhiatna serious tak a ni a, human trafficking a ni a, a case hi a serious hle a. Dubai jail-a thla sarih an tantirtu agency hian dan an bawhchhe ngei a, hremna kum thum thleng lung ina khung emaw, Rs. 50,000 thleng chawitir emaw, a pahnih pawha hrem theih a ni tih an sawi bawk.

Home secretary hlui leh MPCC Lok Sabha MP candidate ni bawk, Lalbiakzama chuan, “Mizoram Private Placement Agencies (Regulation) Act , 2015 chu India ram chhunga thawnchhuak turte tana duan a ni a. Eng vanga kum 18 hnuai lam thawn nge an nih tih leh eng Visa nge an pek tihte chiang taka chhui ngai kan ti a. Chief minister thiltih danah hian hum tum an nei ngei tih a lang a ni,” a ti bawk.