Aizawl; March ni 25, 2014-a Lai Autonomous District Council huam chhunga Village Council inthlanna neih turah chuan seat awm zat chiah chuhtu awmna khaw 8 an awm a, heng khuaa VC candidate-te hi chuhtu awm lova tlinga puan an ni. Hengte hi Indian National Congress thlawp candidate te vek nia hriat a ni. LADC hnuaia VC 93-a inthlan tur inbuatsaihna hi tluang taka kalpui mek a ni a, Contesting Candidates pawh Returning Officer ten an tar chhuak tawhin, State Election Commission-in District Election Officer hnen atanga report a dawn dan chuan Contesting Candidates hi VC 93-ah seat 445 awmin, chuh tura hming pe, RO in an pawm candidate 1,093 an awm a ni. Heng zingah hian General seat chuhtu candidate 888 leh Reserved Seat chuhtu hmeichhe candidate 205 an awm bawk. Seat awm zat chiah chuhna khaw 8 te hi seat 4 awmna Hmawngbuchhuah, Sabualtlang, Lunghauka, Chamdur ‘P’ –II, Chamdurtlang –II leh Kawnkhua te bakah, seat 5 awmna khaw 2 - Bolisora leh Sangau-IV te an ni a. Seat awm zat chiah chuhtu an awm avang-in chuhtu awm lova tlin a puan an ni a, inthlan hmaa complaint a awm a nih loh chuan inthlanna buatsaih a ngai dawn lo tih SEC thuchhuah chuan a tarlang a. Tun dinhmunah inthlan ngaihna Village Council chu 85 a ni dawn ta a ni. SEC thuchhuah tarlan danin, LADC VC inthlan hi March ni 25, 2014 zing dar 7 atanga tlai dar 4 inkarah neih a ni dawn a, vote thlak zawh veleh hian vote chhiar zui nghal a ni ang. Vote tla zat leh Election Result hriat zung zung a nih theih nan SEC chuan 'Communication Plan' mumal tak siamin, SEC Website-ah update reng a ni bawk. Hetih lai hian, Telephone/Mobile Network-in a tuam phak bak, Polling Station biak pawh theih loh 27-ah chuan MPRO Operator-te dah an ni dawn a ni. Sensitive Polling Station a awm loh avangin a tulna hmun bikah lo chuan Police rawih an ni dawn lo bawk. Tun tum LADC in-thlanpuiah hian Village Council 93-a seat 1 theuh chu hmeichhiate tan hauhsak a nih angin Village Council 93-ah te hian hmeichhe candidate awmlohna khua pakhatmah a awm lo a, a tlem berah Village Council  member thar 93 chu hmei-chhia an ni dawn tihna a ni. Inthlanna muanawm, felfai leh thianghlim neih a nih ngei theih nan SEC-a Officer-te leh Staff-te bakah District Election Officer leh a hnuaia hnathawktuten theihtawp chhuahin hma an la mek a, Observer 3 leh Sector Officer 10 ten an bial theuh hneh takin an vil mek bawk.