Aizawl March 7, 2024 : Vawiin khan Mizoram Pradesh Youth Congress Committee leh Mahila te chuan State Bank of India Main Branch kawtah Supreme Court in Electoral Bond details March 6 hma ngeia Election Commission hnena pechhuak tura a tih SBI in duh lova pawhsei a dil an duhlohna lantirna an nei.

He hunah hian MPYCC President Laltawnliana chuan, "India ram hi democracy a nihna angin party ten anmahni inenkawl nan leh ram aiawha thil an tih nan te, an campaign nan te sum an mamawh theuh a. Membership fee an khawn te hi an sum hnar a ni ber thin."

"BJP an rawn sawrkar khan company hovin direct-in party-ah sum pe lovin, Bank atangin “Electoral Bond” an lei theih nan dan thar an siam a. He dan tharah hian BJP hi Electoral bond dawng hnem ber an ni a, Party donation 54% hi BJP dawn a ni. An dan siam khan hetia political party te pawisa dawn hi RTI hmangin a zawh theih lo va, mipuiin party sum dinhmun an hriat a tul an ti lo a ni," a ti.

Supreme Court thutlukna tharah chuan State Bank of India hian party te sum hmuh dan (donation) March ni 6, 2024 hmain Election Commission-ah a thehlut tur a ni tih a ni a, hei hian ram invenhimna lamah pawh nasa takin nghawng a nei dawn a ni a ti a, hei hian mi tam tak a tilawmin, a bik takin RTI ngaisangtute a tilawm a ni.

BJP sawrkar hian SBI hotute chu party-te sum hmuh dan Election Commission-a an thehluh hun tur June ni 30, 2024 thlenga pawtsei turin an ngen a. SBI chuan Supreme Court-ah an hun pawhsei an dil ta a ni (Tun Lok Sabha hi 10 June ah a tawp dawn). Hetiang a nih chuan MP inthlanpui zawhah SBI hian SC-ah party-te donation hmuh dan hi an thehlut dawn tihna a ni a. Khawvela party hausa ber BJP-te sum hmuh dan hi MP inthlan hmain India ram mipui-te hian an hre dawn lo tihna a ni.

Laltawnliana chuan, "Supreme Court of India-in Modi sawrkar black money conversion scheme Electoral Bonds chu constitution kalh leh RTI kalh leh dan kalh tia sawiin a lo hnawl tawh a, SBI pawh donors details March 6 a thehlut hman turin a lo tih tawh a. Hetih lai hian BJP te, hlawkna tel nasatna ber donors 44,434 automated data reilote chhung leka tihfel mai theih ni si thla li chhunga chinfel an ngiat hi a diklo a, tha kan ti lo a ni," a ti.

Congress chuan Electoral bonds hi langtlang lo, democratic lo leh party dang te tihhniam a, BJP te chungnun bika siam a tumna, Prime Minister Modi crony capitalist te thup nana a hman a ni. Lok Sabha inthlan hma ngeia chung mite mipui hriata phochhuah chu Supreme Court ngeiin khua leh tui te rights a ni a tih hi an thlawp tlat a ni, an ti bawk.