Aizawl December 12, 2022 : Congress party chuan, Synod Inkhawmpuiin ram hmalam hun atana fimkhur tak leh ngaihtuahna uluk tak hmanga hlemhletna do tur leh ram hruaitute khalh ngil tura Politics siam that tuma chak zawka hmalak an tumna chu lawmawm an tih thu leh an theihtawp dawn tih thuchhuah an siamah an tarlang.  

Congress  party chuan December 6-11, 2022 chhunga Khatla Kohhrana neih Mizoram Presbyterian Kohhran Synod Inkhawmpui vawi 99 tluang taka zawh a ni ta lawmawm an tih thu an tarlang. Congress  party chuan, "Kohhran kaltlanga  kan ramin hmasawnna tam tak kan neih te, Kohhranin kan ramah remna leh muanna palai hna nasa taka a thawh avanga remna leh muanna kan neih hlut ziate a hre reng a, a ngaihlu takzet a ni," an ti.

"Mizoram hmun hrang hranga Congress Party mipui leh Mizoram mipuite pawh kan rama hlemhletna umbo tur leh Politics tha leh dik kan neih theihna tura Kohhran hmalakna tihlawhtling tura theihtawp chhuah turin kan ngen a. Kan President Lalsawta'n sum chakna chhu chat tur leh MLA Candidate te ti hau tak lo turin Mizoram mipui a ngenna leh hma an lakna te min hriatsak tur leh, min tawngtaipui turin Mizoram mipui kan ngen a ni," tiin Congress party chuan an ti bawk.