Aizawl December 16, 2022; Vawiin khan kum 2022 atana Congress Party Office kharna hun, Congress Bhavan, Aizawl-ah neih a ni a. He huna thusawitu MPCC President Lalsawta chuan Mizoram chu ram nuam, ram hausaah an siam tur thu a sawi a, an sawrkar chuan tu tih mah ni lovin an corrupt loh tur thu a sawi bawk.

Lalsawta chuan, "Hruaitu inthlakah President ka lo ni chho ve ta a, min pawm a, min thlawptu kan party hruaitute leh member te chungah ka lawm em em a ni. Hun a danglam a, mihring pawh kan danglam chho zel. Mihring pawh kan danglam a, kan inthlak chuan kan inhruai dan pawh hi a danglam dawn tih min hriatpui rawh u. Mizoram hian kalphung thar a duh tawh a, thalaite hian thil thar an duh. Chuvangin, keini pawhin kan kalphung hluite kalsan a, kalphung thara kan kal ngam a ngai dawn," a ti. 

Ram hruai dan a danglam theih tih sawiin MPCC President chuan, "Mi thenkhat chuan ram hruaina kawnga danglam hi a theih loh an ti thin. A theih loh titu hi mi ropui an awm ngai lo, a theih ti tlat tute hi mi ropui an ni thin. Miin pawisa nei lo mah se, mi hausa tak ni lo mah se ram hruaitu tha tak a ni thei tih ringtute kan ni, chuvangin, MLA candidate atan a hausa sa kan thlang dawn lo. Kan ram hi kan siamthat theih kan ring tlat a, kan tum tlat bawk. Mipui mamawh sawrkar tha hi kan zuar dawn a, Mizoram hi ram nuam, ram hausaah kan siam dawn. Kan ti thei dawn a ni tih hi kan ring tlat. Congress kan sawrkar chuan tu tih mah ni lovin kan corrupt lo ang," a ti. 

Zodintluanga Ralte, MLA chuan, "MNF sawrkarah Finance Minister-in Finance Department-ah pawisa a kawl khawm vek a, Minister ten an intlawn siak luih luih a. Congress sawrkarah kha chuan Minister tinte hi hnathawhna tur pawisa budget-ah kan dah sak vek thin. Tuna MNF sorkar kan hrawn mek hi Mizoram a sawrkar awm tawh zawng zawnga Financial management a hlawhchham chiang ber a ni. ZPM pawh hi an sawi loh ang hlirin an awm a. Val Upa Council-in MLA hlawh pung lak loh tur an tih chu an la tho a, an motor-a designation plate tar lo tura an tih pawh an tar leh tho. An sorkar hma pawha engah mah an ngaih loh Val Upa Council hi an sorkar hnuah phei chuan engah mah an ngai dawn lo. Hei hi a chiang em em a ni," a ti.

Bhawan kharna hun hi Lal Thanzara, Vice President-in a kaihruai a, Lalsawta, President bakah Zodintluanga Ralte, MLA/Treasurer, John Rotluangliana, Ex Minister leh John Siamkunga, Gen. Secretary, MPCC-ten thu an sawi bawk.