Aizawl March 13, 2024 : Mizoram Pradesh Youth Congress Committee (MPYCC) leh National Students' Union of India (Mz) chuan MBSE in kumin 2024 HSLC exam a buatsaih a, Social Science subject a zawhna thenkhat put ru ngei nia hriat avanga HSLC Exam bei mektu zirlai tam tak rilru hrehawm leh chiai takin an awm an ti a, pawi an tiin an lainat tih an sawi. Education Minister chu bang turin an phut bawk.

MPYCC leh NSUI chuan He thil thleng avanga harsatna tuartu zirlaite thlamuanna thu leh zirlaite tawrhna avanga pawi tihna thu, kam khat mah Education Minister in a la sawi miah lo tiin mak an tih thu an sawi bawk.

Assembly Budget Session neih mekah HSLC exam a zawhna put ru ni ngeia an hriat avanga Education Minister Dr.Vanlalthlana Statement ngun takin an zirchiang an ti. "He thil thleng duhawm lo tak avanga a changtu Minister berin, mawhphurhna la ngam lo a, mawhphurna lak a hneka fihlimna tur leh hmai phihfaina tur zawng a, a taka thawktu zawk te tawrhtir tum zawnga hma a la hian Minister nih a tlin lohzia a tilang chiang hle-ah kan ngai a. MBSE Dan, Malpractices Act 1990 awm reng laia, dan pangngai pel a tisualtu nia ngaih Aizawl PS C/No. 82/24 Dated 10.3.2024 hmanga FIR thehlut a mantir a, Court case U/S 409/417. IPC Next Court - 22.3.2024 hmanga jail thleng tantir a ni hi hriatthiam harsa kan ti bawk a ni," an ti.

Congress thalai leh zirlai pawl chuan Education minister chu bang tura phutin, "Engkima mawhphurtu tur bera ngaih Education Minister - in a mawhphurhna la ngam lo a, midang tawrhtir zawnga hma a la hian hun lo la kal zel turah zirtirtute tan Exam Question siam leh Exam kaihhnawihah thawhhona a tihchhiat a hlauhawm a, Mizorama zirna kal zel turah pawh nghawng tha lo tak a neih a hlau a. Education Minister nihna hian lalna leh thuneihna ringawt a keng lo tih hria a, tun huna thil duhawm lo tak thleng avanga a tuartu Zirlai te hnemna leh thlamuanna thuchhuah (statement) siam ngei turin kan phut a, a mawhphurhna a ni tih pawm ngam a, Education Department changtu Minister anih ang ngeia bang ngei turin kan phut a ni," an ti bawk.