June 2, 2023; Vawiin khan Congress thalai MPYCC hruaitute chuan an president Laltawnliana hovin school education minister hnenah, sawrkar primary school leh middle school zirlaibu sem mumal loh leh Samagra zirtirtu hlawh lak that loh chungchang ziakin an thlen.

An lehkha thehluh ah chuan school education department hnuaia sawrkar primary school ten vawiin thlengin an zirlaibu an la dawng lo tih tarlangin, a dawng tlem a zawng awmte pawhin subject hnih khat chauh an la dawng tih an tarlang.

He thil hi an hriat thiam loh thu tarlangin, "Zirlai-te hi an zir tur lehkhabu pek nghal ni rawh se," an ti.

Samagra hnuaia zirtirtu ten tun thlenga hlawh an la la lo pawh an hrethiam lo hle tih tarlangin, "Education kaihhnawih thil-ah kher hi chuan sawrkar, a bikin i department-te hi chu inthlahdah lo turin kan ngen tak meuh meuh a ni.

Keini Congress Thalai-te chuan zirlai ten zirlaibu an dawn leh dawn loh hi kan ngaihven reng dawn a ni tih kan hriattir bawk a che," an ti bawk.

School education minister leh a private secretary te an lo awm loh avangin, minister personal staff te hnenah lehkha hi an thehlut a ni.