Consumer Protection Act, 1986 hnuaia consumer complaint thehluh dan. 1. Tuin nge consumer complaint thehlut thei?   i) Consumer: Consumer chu thil leitu leh hmangtute hi kan ni a. Dawrah thil leitu chuan a thil lei chungchangah tha lo emaw, chiang lo emaw a awm a nih chuan thil tha lei tura man a pek angin thil tha chan chu a dikna chanvo a ni. Mi tin mai hi eng emaw zawng takin consumer kan ni vek a. Kan consumer nihna zawnah kan chanvo kan chang lo anih chuan dan hnuai fel takin complaint a siam theih a ni.   ii) Pawl ho/Association: Entirna:- Consumer Union   iii) Central Sawrkar leh State Sawrkar   iv) Consumer eng emaw zat awmnaah, an zinga consumer pakhat emaw a aia tam emaw   v) Consumer a boral a nih chuan a aiawh a chhung hnai nupui/pasal/fa etc.   2. Engtin nge consumer complaint hi thehluh tur? Consumer complaint hi consumer tupawhin amahin emaw, a aiawh emaw, a ‘Advocate’ hmangin emaw a chunga kan sawi District Consumer Redressal Forum, State Commission, National Commission-ah te hian kan thubuai hlut zawng azirin consumer complaint hi a thehlut thei. Thil hlutna lian tham chungchanga claim/complaint siam anih dawn chuan hetiang lama thubuai hlabuai la buaipui ngai lote chuan an tisual fo thin a; chuvangin, dan hremi ‘Advocate’ te rawih mai hi a tha zawk fo. Registered post pawhin thehluh theih a ni a, complaint copy hi a tlem berah copy 5 a thehluh a tha. 3. Khawi hmunah nge consumer complaint hi thehluh tur nge?   (i) District Consumer Forum: District tinah Consumer Redressal Forum a awm a, mahni awmna district-ah emaw kan thil leina hmun district-ah emaw thehluh tur a ni. He District Consumer Redressal Forum hian thubuai hlutna Rs. 20 lakh aia tam lo thubuai a khawih thei a ni. Thubuai hlutna azirin Court Fee Rs. 100 atanga Rs. 500 pek tel a ngai bawk.   (ii) State Commission: Thubuai hlutna Rs. 20 lakh atanga Rs. 1 crore thleng hi State Consumer Forum hnena thehluh tur a ni a. District Consumer Forum Order avanga lungawilo ten Order chhuah atanga ni 30 chhungin State Consumer Forum-ah appeal an thehlut thei bawk. Thubuai hlutna Rs. 20-50 ah Court fee Rs. 2,000 chawi a ngai a, thubuai hlutna Rs. 50 lakh – Rs. 1 crore chinah Court fee Rs. 4,000 chawi a ngai a, Appeal case-ah erawh Court fee chawi a ngai lo thung. Mizoram State Consumer Forum hi Tuikhuahtlang, Aizawlah a awm a, hemi building hnuai lamah hian Aizawl District Consumer Forum hi a awm nghal bawk a ni.   (iii) National Commission: Thubuai hlutna Rs. 1 crore chin hi National Commission hnuaiah thehluh tur a ni a, court fee Rs. 5,000 a ni. Hei bakah hian State Commission-in Order a siam avanga lungawi loten ni 30 chhungin National Commission-ah appeal an thehlut thei a, appeal-ah hian Court fee a awm lo.   Consumer complaint thehlut tur chuan receipt leh document pawimawh awm thei ang ang felfai takin a complaint-ah a thehluh tel a ngai thin a; chuvangin, kan thil leina receipt te, leh nakina kan la mamawh theih tur document te hi kan vawn that thin a pawimawh hle a ni.