Aizawl : Mizoram sawrkar chuan contact tracing leh quarantine a kalpui danah kalphung a thlak hret dawn niin ZALEN chuan thu a dawng a, engtik atanga kalpui tur nge erawh hriat a la ni lo.

Medical Operation Team chairman Dr. ZR Thiamsanga chuan a tul ang zela hmalak a nih tur thu a sawi a, test nghal tur tih hi a la awm chuang lo a, thutawp siam a la nih loh tur thu a sawi.
   

Tuna kalphung angah hi chuan positive an awmin an chhungte chu khunghran phawt hnuah ni 10 hnuah test an ni thin a, tuna kalpui an tum ang chuan positive awmna chhungkua hi test nghal vek zel tawh tur a ni a, positive an awm lo anih pawhin khung hran a, a hnu ni 7-ah test leh tur an ni.
   

Contact tracing pawh a hmalam ni 10 chhung thleng chhui thin chu ni 4 thleng bak chhui a ni tawh dawn lo niin hriat a ni bawk.  Dr. Thiamsanga chuan chhui thui lutukin awmzia a awm loh avangin ngaihtuahna erawh sen a ngai a, a tak a thlen hma loh chuan engmah chiang a la awm loh thu a sawi.
   

Health Minister Dr.R Lalthangliana ho a Zirtawpnia thukhawm chuan mahni inringhlel ten awlsam taka sample an test theihnan tuna kiosk kalpui mek bakah Vanapa Hall-ah a thlawna sample test theih na tur a rang thei ang bera ruahman tha an tih thu an sawi a, hmun dang remchang dap nghal ni bawk se an ti a. 
   

Containment Zone a awmte leh Positive awmna chhung-kuate chu a rang thei ang bera sample test vek zel tha tih a ni bawk.