National Institute of Disaster Management (NIDM) a mi thiamte chuan Coronavirus thawh thumna chu October-ah a vanglai a thleng dawn niin an sawi a, naupang lamah nghawng a nei nasa dawn tih an sawi. 

NIDM mi thiamte hian tun hnai khan report an tichhuak a, India ramah chuan October hi hripui len nasat leh hun tur a nih an rin thu an tarlang a, hei vang hian public healthcare system pawh nasa leh zual zawka tihchangtlun a ngaih thu an sawi. A thawh thumnaah hian puitling lamah aiin naupang lamah hri a darh nasa zawk dawn niin an sawi a, hei vang hian fimkhur leh zual a ngai dawn.  

NITI Aayog-a COVID task force hotu leh physician scientist ni bawk VK Paul chuan thla thar lo awm turah hi chuan ram chhungah ni khatah hri vei nuai ruk vel hmuh chhuah a nih chhoh leh tawh a rinawm tih a sawi a, hetiang hi a thlen lohna tur chuan tun atanga fimkhur hle a ngai tih a sawi. 

Covid-19 damdawi hi kum lama naupang zawkte pek an la ni ve lo a, hei vang hian hri an vei theihna chance a sang hle. Vaccine la ve lo te hian la tawhte aiin a let thum vel laiin hri an kai hma zawk nia sawi a ni. 

Hripui leng thawh thumna hma chhawn tur hian India sawrkar chu nasa takin a inbuatsaih a, Union Home Ministry kaihhruaina hnuaiah National Institute of Disaster Management (NIDM) committee din a ni a, hmalak dan tur hrang hrang ruahmanna siamin an bawhzui mek a ni.