ZALEN October 25, 2024 : Vawiin khan Kulhpawn Monitoring te chuan Aizawl Press Club-ah Chanchinthar thehdarhtute an kawm a, he huna thusawitu zingami Lalmanzuala, IAS (Rtd) chuan corruption avangin Mizoram chu state dangte hmuhsit a nih thu a sawi.

Mizoram sawrkara Chief Secretary hna pawh lo chelh tawh Lalmanzuala chuan, "State chawmhlawm nih reng hi thil zahthlak tak a ni a, zah pawh kan hlawh lo mai ni lovin min hmusit phah. Corruption avangin sawrkar laipui rin pawh kan hlawh lo a, kan thenawm state ten Governor tur mihring an neih tawh laiin tun thleng hian Governor tura ruat pawh an la nei lo hi a zahthlak," a ti.

Lalmanzuala chuan hnathawhna avangin hmun state hrang hrangah hnathawka a awm thin thu a sawi a, Minister leh sawrkar hnathawk lian tak tak pawh suspend leh thiamloh chantir an awm rualin Mizoram chu corruption kai rualna ber nia a ngaih thu a sawi a ni.

Lalmanzuala chuan party politics pawh a chhungah a lo luhchilh tawh thu sawiin a chhung boruak a hriat chian hnuah awmna tlakah a ngai lo thu leh ram hmangaih tak tak a hmuh loh thu leh mahni tang hma hai chiah an ngaihtuah a ni a ti a, party dang pawh chutiang tho an nih avangin party politics-ah a inhnamhnawih duh tawh loh thu a sawi bawk.