Mizorama kohhran hrang hrangte inpumkhat zawka thawhhona tur, Council of Churches in Mizoram (CCM) chu October 26, 2024 (Inrinni) chhun dar 12:30 hian Mission Veng Kohhran Biak Inah hawn a ni dawn ta a. Din a nih theihna atan hian Mizo Theological Association chuan kum 2010 vel atang khan hma an la tan a, a tawpah a hlawhtlinna hmel hmuh a ni dawn ta.

CCM din chungchânga kohhran hrang hrang aiawh joint meeting hmasa ber chu January 24, 2023 khan Baptist Church of Mizoram (BCM) Headquarters Office, Sêrkawn, Lunglei-ah neih a ni a. Chutah chuan Mizoram Presbyterian Church (MPC) aiawh mi paruk; Evangelical Church of Maraland (ECM) aiawh mi pali; Lairam Isua Krista Baptist Kohhran (LIKBK) aiawh mi panga; The Salvation Army (SA) aiawh mi paruk leh BCM aiawh mi pariat an kalkhâwm.

Kalkhâwmte hian inpumkhatna kawnga council din chu tha an ti a. A ruangâm tûr (structure) duang tûrin kohhran tin atangin mi pahnih zêl ruatin member 10 awmin Drafting Committee a din nghal a. Drafting Committee ruahmanna enho tûrin joint meeting chu Booth Manson Hall, The Salvation Army Territorial Headquarters, Tuikual, Aizawl-ah May 19, 2023-ah an kalkhâwm leh a. Chutah chuan chairman, secretary leh recording secretary-te bâkah MPC atangin mi pasarih; BCM atangin mi paruk; ECM atangin mi panga; SA atangin mi panga; LIKBK atangin mi paruk; EFCI atangin mi paruk; IKK Bualpui (Ng) atangin mi panga; an vaiin mi 43 an kalkhâwm a ni.

He mi tum hian a ruangâm tûr Drafting Committee lo duan chu an thlir ho a, siam that ngaite siam thain an pawm a. An pawm tâk chu mahni kohhran rorêlna sâng berah ngaihtuah tûrin thlen theuh an rêl a ni.

Mahni kohhran thuneitu sâng hnêna an thlen theuh hnuah joint meeting chu April 3, 2024 khân J.M. Lloyd Hall, MPC Synod Office, Aizawl-ah neih leh a ni a. Hetah hian chairman, secretary leh recording secretary-te bâkah MPC aiawh mi pasarih; BCM aiawh mi paruk; ECM aiawh mi paruk; LIKBK aiawh mi paruk; EFCI aiawh mi paruk; IKK Bualpui (Ng) aiawh mi panga an kalkhâwm a, an vaiin mi 40 an ni.

Salvation Army chuan an inkhawmpuiah an la pawm remchan loh avangin hemi tum hian aiawh an intir lo.

Kohhran hrang hrangten Council of Churches din chu an remtih vek avângin engtia hmalâk zêl tûr nge tih an ngaihtuah a. Drafting Committee-in Dânpui (Constitution) lo duang se la, chu chu June 11, 2024-ah MPC Synod Office, Aizawl-a meeting-ah enho leh ni se an ti a. CCM din hun atân October 27, 2024 ni se, tih an rêl bawk.

CCM hruaitu tûrin a bul tan nan hetiang hian chanvo an insem - President: Rev. R. Lalbiakliana (BCM), Vice President: Rev. B. Zazawna Lai (LIKBK) leh Rev. Lalrodinpuia LS Nghaling (IKK Bualpui NG), General Secretary: Rev. Dr. Lalhmangaiha (MPC), Joint Secretary: Rev. T. Salaw (ECM), Treasurer: Upa R. Lalmalsawma (MPC) leh Finance Secretary: Rev. Jessai L. Neitham (EFCI).

Tun dinhmunah CCM-ah hian kohhran pariat - BCM, EFCI, ICI, IKK (Ng), LIKBK, MPC, Wesleyan Methodist Church leh ECM te an tel a. An dinchhanah chuan Isua Krista duh dan anga Mizorama kohhrante inpumkhata awm, chanchin tha hril kawnga inrem taka thawh ho leh ram leh khawtlang siam that kawnga thawh ho te a ni a. Kohhran member 3,000 nei chin tan tel theih a ni.