Tuikual South khawtlang mipuite chuan Thawhlehnia court-a an veng nu, V. Lalhmingthangi (Hmingtei) thattua puh a inlan hunah punkhawm an tum.

Kum 54 mi, Hmingtei hi March 16, 2024 zan khan Aizawl New Market-a a dawr kudamah Irene Lallawmzuali, Ramthar North chuan a that nia puh a ni a. A tukah a ruang hi hmuh niin a thattua puh pawh hi reilo te hnuah man nghal a ni.

Irene-i hi Thawhlehni hian Chief Judicial Magistrate's (CJM) Court, New Capital Complex-ah chawhma dar 10:00-ah inlanin a chungthu ngaihtuah a ni dawn a. Hemi hunah hian Tuikual South khawtlang chuan Hmingtei thlavang hauh nan leh tualthattuin a phu tawk hremna hmu ngei se an duh tih lantir nan punkhawm an tum a ni.

Tuikual South hian Thawhlehnia vui tur mitthi pathum an nei mek a, heti hi ni mah se LC leh NGO thukhawm chuan an venga chhung tinte chu court-a kal tur leh chhiattawhnaa kal turte insiam rema a tam thei ang ber pungkhawm turin sawm a ni.

Hmingtei hi a dawr neihna hmun atang hian zan tlai tak taka haw thin a ni a, thah a nih zan pawh hian tlai leh deuhvin a haw tawh tur chu dawr tura insawi hnen atangin phone a dawng a, a lo nghak chu hetiang hi a tawng ta a. A tukah a chin ngaihventuten a kudam kawngka leh kalhna vela thisen kai an hmuh atangin a ruang hi an hmu zui ta a ni.