Aizawl; Congress Party Vice President, Home Minister ni bawk R Lalzirliana chuan, EVM tihchingpen chungchang K Chhawnthuama'n a sawi chungchangah, Court-in EVM tihchingpen a ni tih a finfiah phawt chuan Congress party politician te chu an bang vek ngam tih a saiw a. Hetih rual hian, EVM te tihchingpen a ni lo tih Court-in a finfiah a nih chuan, EVM tichingpen a ni tia puhtu politician zawng zawng bang ngam vek turin an phut tih nimin khan Aizawlah thuthar lakhawmtute a hrilh. MPCC Vice President chuan, K Chhawnthuama thusawi thenkhat sawifiahin, December ni 2, 2013 (Pathianni)-a Congress Bhavan atanga 'Observer' tih sticker inbel, Mahindra Bolero tlan chhuak tia a sawi chu a registration number a sawi loh avangin phuahchawp thil a ni, a ti a. December ni 2, 2013 chu Pathianni a ni lo, a ti bawk. 'Pachhunga University College building chhawng thumnaah Alcatel khawl hmanga remote control hmanga EVM tihchingpen thu K Chhawnthuama'n a sawi chu College hotuten an hria em, hei hi Chhawnthuama hian a hria a nih chuan a tirah sawi awm tak a ni a, engatinge rei tak a ngawih' tiin thu belhchian dawl lo a ni, a ti. Serchhip DC Bangla bula in teah EVM dah nia K Chhawnthuama'n a sawi chungchangah, DC Bangla bulah hian Strong Room a awm loh avangin thu dik lo hulhual a ni, R Lalzirliana chuan a ti a. Strong Room nia K Chhawnthuama'n a sawiah EVM chu lo awm pawh nise, an lakchhuah dawnin Security Guard an awm lo nge, a sawi dan hi rin duap kai sa a ni, a ti a. Congress party media cell ami pahnih a tihte chu an hming sawi tur te, Mizo ni lo, computer scientist a tihte epawh a hming sawi tura an phut thu te, pawisa cheng nuai 1080 mi 28 hnena sem nia a sawi chu tute nge tih an zawt tih a sawi bawk. Hei bakah hian, K Chhawnthuama'n election agent lungawi lo a tihte chu tute nge tih puangzar turin an chah a, lungawi lo nise an ngawi rei hle a ni, Home Minister chuan a ti a. Strong Room tala kawngsira paih chhartu te, video-a lak a nih kher chhan te, a chhartuin kutkawr var a vuah kher te chu sawifiah turin an phut tih sawiin, "Chhawnthuama hian Mizoram hmun hrang hranga thil thlen dan hi a hmuna awm a, hre vek angin a tawng a. Amah leh a hote hi mi engemawzatin lem changin thil an ti em ni? A thawhpuite hming hi sawi lang law law se kan duh," a ti bawk. K Chhawnthuama chu chhungkaw lama vanduaina nasa tak tawk thin a nih thu sawiin, "Hei vang hian rilru lamah harsatna a nei a ni ang tih kan ring a, chuvangin thil nilo pui pui a sawi tam hmain rilru Doctor ten uluk takin amah hi enfiah se kan ti," tiin a sawi bawk a ni. Eptu party tang-rual - United Democratic Front (UDF) chuan nimin khan thuchhuah siamin, K Chhawnthuama'n chiang taka kum 2008 leh 2013 Mizoram General Election-a thil tenawm ber mai titu, a bul tumtu ber nia a puh Lal Thanhawla, Mizoram Congress party president leh Chief Minister ni bawk chu, he puhna atanga a insawifel thei lo a nih chuan, Chief Minister a nihna atanga bang nghal turin an phut tih an sawi a. Hetianga thil tha lo leh tenawm tak ti duhtu hi Mizoram Chief Minister atan pawm chi a ni lo tiin, Mizo hnam leh sakhua timualphotu tenawm takah UDF chuan a ngai lo thei lo a ni, an ti bawk.