Favang lenkhawl eng kan hma lawkah a awm ta, tun hi lo zawh runpui hun a ni e, a van nuam thin em! Mizo khawsak phungah lo kan nei a, furin min chiah zawr hnep hnuah lo kan zo, a ni, arpa chhiarkhuan ngei kan han hmang takte kha aw, thlam namthlakah kan thu a, ral lehlama rite buh hring cham dur thlirin ke kan then heih heih, thingpui sen dum kuk no bal tawkah kan in, a sa lutuk in tawk te tein kan chhem dai. An tunlai dan, puipunna hmuna meizuk khap tihte hi a rim a ra pawh kan la hre hek suh le, ei ruk lam sawipui dawna titi dang sawi tur dap ruai, mi mei zu man tur zawnga taima hle si tumah reng an awm lo, kan ei ruk ve theih tawk vawk vun kan puah kan seh ri rup rup maite chu e, eiruk a har teh asin, eiruk ni loin eirik bup bup eilan hi a chang zel. Khurbing khurdar ang deuh hi a ni e. Aw vau ngawpui kara rengchal leh ngirtling, dawlrem leh vevu hramin min awi hlerh hlerh mai thin takte kha aw, hmanlai lung tileng mai a chang zo ta e. Chutihlaiah kei tehlul hi he kan Zalen chanchinbu ngeiah hian zawhna min rawn zawt an awm ve teh khiah mai a, han ngawisan reng dawn ila induh min tih ka hlau si, kei sam sei chalfilh ve tawh ha kuh hi, darthlalang hmaa kan han dina ka inen hian e, han induhna chhan tur erawh a vang khawp mai. Dawnfawh dih erawh ha kuh ta na na na chu, a leh rem phian mahna, tih lek mai a ni e. Court-ah hian Ukil ruai loin mahniin a din theih em? tih kha min zawhna a ni lom ni kha, aw ti ve mai thin la. Theih e, ti top mai teh ang. Tun hma Mizorama Separation an tih mai a awm hma, District Council Court hun laite phei kha chuan Ukil an ding ngai meuh lo zawk a, thubuai pawh kha rei lo teah an tizo zung zung thin. Mahse hun a lo kal zel a, kan changkang zel a, tunah erawh kan ramah Separation of Judiciary an tihte a lo awm ta, Ukil pawh za rual teh meuh an phu suau suau a, ni tin mi an thleng thla tin an tam kum tin an pung zel, tih ang maiin an pung zel bawk. Mahse, ukil ruai loin mahniin ding dawn ta ila, lehkha thehluh tur ziak dan pawh a tam berte chuan kan hre hauh lo vang le, High Court-ah emaw Supreme Court-ah emaw ding dawn ta ila, lehlama Ukil thiam tak tak nena dan leh Court rorel tawhna hrang hrang tanchhana hmanga sawi chhuaka han inhnialpui erawh a huphurhawm duh phian ang. Roreltu khan ukil pawh ruai duh lo, mahni thiam leh hria inti ve tawk niin min hmu ngei ang a, dan eng eng emaw kha min zawt thin sela, ngawih vang vang a awl duh khawp chuan ka ring. Kei thubuai nei ni ve ta ila, mahnia din ai chuan Ukil ka ruai ngei ang. Pawisa a rawihna tur nei lo tan pawh sawrkarah a dil theih tho bawk si a. Ti khian kan zawhna chu a chhang turah ngai mai ang aw. Sawrkar aiin Court a lal zawk em ni? tih kha zawhna dang a ni lawm ni kha? India chu inthlang ram, Democracy ram a ni a. An sawi thin angin lungthu pathum anga pawimawh thil pathum, pawimawh dan inang vek leh hrang vek si, lal bik leh lal lo bik awm chuang lo, dan siam pawl Legislature leh a kengkawhtu, Excutive leh dan anga rolretu Judiciary an tih a awm a, an thuneihna a inang lo vek a, pawimawh ber an awm chuang lo, an pawimawh vek. Mahse sawrkarin thil a tihte chu dan ang loin a tihin emaw India danpui kalh emaw tuemaw tana pawi thei dan ang lo taka a tih chuan court-ah khin a ni thin. Sawrkar court-a khinna thubuai hi a tam khawp mai, chuvang chuan sawrkar pawhin a aiawha court-a ding turin Ukil a nei thin. District Court-ah chuan Govt . Advocate an ti a, Hig Court-ah chuan Advocate-General an ti a ni awm e. Supreme Court-ah thung chuan sawrkar ukil chu hming dang an lo vuah leh thung. Sawrkarin thiam loh a chang tam zawk mahin a lang a, pawisa a chawi tak a tam em em a, a hnathawk dik lo taka a ban, Court-in sawrkar thiam loh a chantir a, la let leh tura a tih, an lak let tak lah an tambawk, chumi avang chuan court chu sawrkar aiin a lal zawk tihna a ni ngawt kher lo. Court hmaa thubuaiah erawh a reltu court a lal ber. Mahse dan siam pawl khan dan a siam a, chu a dan siam ang chuan court chuan ro a rel thung, sawrkar chu a lal zawka court-in a hman turin dan a siamsak, ti ta ila a dik lohna pawh a awm lem lo, mahse sawrkar han tih hin Government a kawk lo, State a kawk zawk. Ti hian Bible Hrilhfiahna, tihna a ni awm e, tih ang deuhin fiah lo ruai chuan kan zawhnate kha ka han chhang ve chu a ni a, a fiah zan lo deuh a nih pawhin a fiah lo deuh ruai tal em ang chu maw?