Aizawl: Zoram Medical College-ah Covid-19 damlo enkawlna atana damdawi an hman te chu tun dinhmunah an ngah tawk a, ventilator pawh an nei tha tawk a, ventilator thar 10 rawn bun turin phai lam atangin company engineer te an rawn kal dawn.

Nimin khan Health Minister Dr. R. Lalthangliana hovin SAD Conference Hall, MINECO-ah Mizorama COVID-19 kaihhnawih thil pawimawh tak tak sawiho a ni a. Meeting-ah hian COVID-19 vanga nu leh pa emaw, nu/pa chan naupang mi 63 an awm tawh thu tarlan a ni a, an zinga 59 hi nu leh pa kara cheng, nu emaw, pa emaw thi niin, midang zawng hi nu emaw, pa emaw nen chauha awm (single parent-in a enkawl) an ni. 

ZMC daktawr te chuan tunhnaiah ZMC a admit thar leh ICU a enkawl zingah kum naupang lam (thalai ho) an pung tih an sawi a, nitin OT ah COVID-19 positive zai ngai an neih thin tak thu sawiin, raipuar COVID-19 positive admit ngai an tam thu an sawi bawk a ni. 

COVID-19 hri kaite enkawl dan tur Ministry of Health & Family Welfare in a duan thar chu thlirho a ni a, hri kai zingah symptom nei lo leh symptom nei nasa lo (moderate/mild symptomatic) te tan damdawi mahni duh ang ang lo inchawh ve ngawt a him loh thu tarlan a ni. Nachhawkna pangngai (paracetamol) bak ei a tul lo an ti a, COVID-19 damdawi dik tak hmuhchhuah a la nih loh avangin daktawr te hriatpui loha damdawi lo lei mai mai a tha lo tih an sawi a. Tun dinhmunah a hma aiin damlo na zual enkawl ngai an tlem tawh tih tarlangin damlote enkawlna tur bungrua leh hmanraw chi hrang hrangah thlaphanna tur a awm rih loh thu an sawi a, RT-PCR kit 7500 vel an la neih thu leh tunah hian an chah belh leh mek thu an tarlang bawk. ZMC-a COVID-19 hri kaite enkawlna tur ward thar khum 30 awmna chu an hman tan tawh thu sawiin, tun dinhmunah khum 277 a awm mek thu an tarlang a, ward dang 1 khum 30 awmna pawh kar hnih chhungin an peihfel leh hman an inrin thu an tarlang bawk. Sample Test runpui (mass testing) chu karleh lockdown puan chhung hian Aizawl khawpui chhungah nasa lehzuala kalpui tum a nih thu tarlan a ni a, private hospitalte pawhin sample collecting team anmahni mi leh sate atang an thawhchhuahpui theih tur thu an sawi.

Health Minister Dr. R. Lalthangliana chuan, "Mizoramah COVID-19 hri kai kan la pun belh zel rual hian kan ngaih pawimawh ber tur pakhat chu hri kaite nunna chhanhim a ni a, daktawr te leh healthcare frontline workers ten theihtawp chhuaha tha leh zung tak meuh senga an thawh avangin Pathianin an thawhrimna mal a sawm a, State dangte nen khaikhin chuan kan dinhmun a la ziaawm hle a ni," a ti a. Nunna chhan tura an thawhnaah lawmawm a tih thu sawiin, tha thlah lova theihtawp chhuaha tang fan fan turin a chah a, Mizoram mipuiten an chungah rinna an nghat a ni, tih a hrilh a ni. 

June ni 28, 2021 thleng khan Mizoramah vaccine dose 555286 pekchhuah tawh a nih thu tarlan a ni a. First dose la mi 500990  awmin full dose la mi 54296 an awm tawh a ni. Electoral roll thar ber atanga chhutin Mizoramah vaccine la thei (kum 18 chunglam ) mi 775106 an awm a, heng zinga mi 500990 (65%) hian vaccine an la tawh a ni. Vaccine first dose pek hmabak hi mi 264116 la awm anga chhut a ni.