India chu khawvela Covid-19 tuar nasa ber ram a ni mek a, hmun hrang hrang atangin tanpuina pawh a dawng mek. Hetih lai hian Bollywood star te pawh an awm mai mai bik lo a, Covid-19 tuarte tanpui nan leh a doletna atan an sum leh pai an theh chhuak mek zel. 

Shah Rukh Khan, Saif Ali Khan, Kareena Kapoor, Deepika Padukone leh Ranveer Singh te chu midang tanpui kawnga che chhuak langsar an ni a, Priyanka Chopra leh Nick Jonas te pawh an awm mai mai bik lo - harsatna tawkte tanpui turin an pen chhuak.

Bollywood lam an che tha
India rama film star lar ber berte chuan Covid-19 doletna kawngah nasa takin hma an la a, harsatna tawk mi tam tak an tanpui tawh. Saif Ali Khan leh Kareena Kapoor Khan te chuan PM-CARES Fund-ah sum thahnem tak an donate a, Maharashtra Chief Minister Relief Fund-ah sum an chhung lut bawk. 

Shah Rukh Khan chuan PM-CARES Fund-ah hian sum thahnem tak a thawh bawk a, a foundation din Meer Foundation chuan Maharashtra leh West Bengal sawrkar hnenah PPE 50,000 an pek tur thu an puang bawk. Meer Foundation hian Mumbai-a inhlawhfa chawpa khawsa mi 10,000 hnenah meal kit nuai thum an hlan bawk. 

Deepika Padukone leh Ranveer Singh pawh an awm mai mai bik lo - PM-CARES Fund-ah sum an thawh bakah hripui avanga harsatna tawk mekte chu dam tha leh thuai turin duhsakna an hlan. 

Sara Ali Khan pawhin PM CARES Fund leh Maharastra CM Relief Fund-ah sum a donate a, Priyanka Chopra leh a pasal Nick Jonas te pawhin pawl hrang hrang 10 hnenah tanpui an hlan a ni. 

'Uri: The Surgical Strike' star Vicky Kaushal pawhin a robawm chu tanpui ngaite tanpui nan hawngin vaibelchhe khat zet a theh chhuak a, Bollywood super star Akshay Kumar phei chuan Covid avanga harsatna tawkte tanpui nan hian vbch 25 zet a thawh hem mai!

Salman Khan chuan nitin inhlawh fa mi 25,000 hnenah ei tur a pe a, Katrina Kaif pawhin PM CARES Fund leh hripuiin a tihbuai nasat Maharashtra sawrkar hnenah tanpuina a hlan thu a puang. Varun Dhawan-a'n a tul a pianga hman turin nuai 25 a theh chhuak a, Shilpa Shetty pawhin nuai 21 zet a thawh bawk.