Aizawl; Covid 19 dona atan MLA fund hman a nih dawn leh dawn loh ah thutlukna siam a la awm lo a, an hlawh atanga sum an thawh dan tur ruahmanna erawh a awm tawh ni a thudawn a ni. 

Assembly speaker Lalrinliana Sailo hnen atanga ZALEN thudawn danin, MLA ten an hlawhpui atanga 10% (Rs. 15,000) zel Covid dona atan thawh turin ruahmanna a awm a, hei bakah hian MLA fund atanga sum an thawh dan tur pawh sawi rik awm tawhin, thutlukna siam erawh a la awm lo. Lalrinliana Sailo chuan MLA fund (2021-22) atanga Covid dona tur sum thawh chungchang ah inrawnna tak tak a la awm rih loh thu a sawi a, sawi khawm a, ngaihtuah tlan a la ngaih tur thu a sawi. 

April 1, 2020 khan MLA 40 te chuan Covid 19 do nan an hlawh atangin CM relief fund-ah Rs. 21,26,000 an lo pe tawh a. May 7, 2020 a  Assembly Speaker hova Legislature party hrang hrang (MNF, ZPM leh BJP) aiawhte thukhawm chuan December 2020 thleng an hlawh zaa 30 chu Covid 19 dona atan pek rel bawkin, hemi bakah hian MLA-LADS fund 2020-2021 atangin Covid 19 fund atan CM relief fund-ah cheng nuai 50 theuh thawh an lo remti tawh bawk.

Speaker hova Legislature party hrang hrang aiawh thukhawm-na a tel lo, Congress MLA 5 te chuan May 20, 2020 khan CM hnenah Covid 19 do nan an May thla hlawh zawng zawng thawhkhawm, cheng nuai 4 an lo pe tawh a, MLA fund atang erawhin CM relief fund a thawh an nei lo thung.

Tunhnai April 29, 2021 khan AMC Councillor te chuan CM relief fund for Covid 19 ah an thla chanve hlawh Rs. 95,000 an lo pe tawh a, sawrkar hnathawk te pawhin Covid-19 dona atan ni khat hlawh thawh khawm pek an lo remti tawh bawk.