DOWNLOAD OUR APP

Read latest news on your phone
app-store
Covid-19: Hri kai mi 44,111 hmuh belh, mi 738-in thihpui
Jul 03, 2021

India ramah darkar 24 liam ta chhungin coronavirus kai mi 44,111 hmuh chhuah leh hman an ni a, mi 738-in an thihpui.

Tun hnai ni 97 hnuah damlo enkawl lai mi nuai nga aiin an tlem ta a. Kai tawh zawng zawng atanga damlo mek hi 1.62% chauh an ni tawh.

Darkar 24 chhung hian enkawl dam mi 54,000 chuang an awm a, an vaiin mi vaibelchhe 2.96 an ni tawh.

A zawnin ni 51 chhungin kai hmuh chhuah thar aiin dam an tam tawh zawk a. State tam zawkah vei mekte hi a kaihhnawih natna an neih tawh lem loh chuan RAT emaw, RT-PCR emaw hmanga endik leh kher tawh lovin mi thiamten dam angin an puang tawh mai thin.

Hri kai zinga enkawl dam hi 97.06% lai a ni tawh a. Hri kai leh kai loh endik atanga kai hmuh chhuah zat pawh 2.35% niin a zawnin ni 26 chhungin 5% hnuai lam a nihna a ni tawh.

World Health Organisation chuan hri kai endik atanga hmuh chhuah zat 5% chin hnuai chu him (safe zone) a ti.

Vaccine dose pawh darkar 24 liam ta chhungin nuai 44 pek leh hman a ni a. Pek tawh zawng zawng hi dose vaibelchhe 34.46 a tling tawh tih health ministry-in an puang.

Sorkar laipui chuan Zirtawpni khan nau pai tan vaccine a lak theih tawh tih a puang a, CoWIN-a hming thehluh emaw, vaccine centre emawa inchiu turin an kal thei tawh. 

Thla hmasa khan nau hnute pe laiten vaccine a la ve thei tan a, nau paite erawh chu khatih hunlai khan enchhinna la zawh a nih loh vangin pek khapsak an la ni rih. 

Bharat Biotech Covaxin vaccine chuan Covid-19 kaihhnawih natna 77.8% vel a dang thei niin a siamtuten an sawi a, hei hi an enchhin thawh thumna an kalpui atanga an chhinchhiah dan niin an sawi.

MSSSB thiah leh thiah loh
Mizoram Subordinate Services Selection Board thiah tum hi eng nge i ngaihdan?
Thiah tha ka ti
Thiah kher tul ka ti lo
Ka hrethiam lo

Latest News & Chhiar Hlawh