Aizawl : Mizorama Covid-19 positive hmuh tawh zingah Mizoram chhunga inkaichhawn aiin state pawn atanga lo lut an tam zawk.

    Mizoram IDSP bulletin tar lan danin Mizorama Covid-19 positive hmuh tawh 4,435 zinga 2,318 chu state dang atanga Mizoram rawn lut/hawte atanga hmuh a ni a, a dang 2,117 hi tual chhunga inkaichhawngte an ni. Mizorama Covid-19 positive zingah tual chhung mi (civilian) an tam ber a, mi 3,217-in hripui hi an kai tawh a. A dawta kai tam ber chu force mi niin BSF 584, Assam Rifles 254, BRO/BRTF 81, Indian Army/CIJWS 46, CRPF 36 leh NDRF 32 bakah trucker 185 te an ni.

    Mizoramah Covid-19 hri vei an tlahniam zel a, Covid-19 vei hi January thlaah mi 168 hmuh chhuah an ni a, February-ah hri kai thar 51 an awm a, March thla hri kai mi 12 hmuh chhuah an ni tawh. Tun kar bikah March 7, 2021 khan Mizoramah COVID-19 positive thar hmuh chhuah a awm lo a. March 8, 2021 khan positive thar 4 hmuh chhuah an ni a, March 9, 2021 khan positive thar 2 hmuh chhuah an ni leh a, March 11, 2021 khan positive thar 1 hmuhchhuah a ni bawk.

    March 12, 2021 (Zirtawpni) khan Mizoramah COVID-19 positive thar hmuh chhuah a awm lo. ZMC RT-PCR Laborator- a sample test 15 (mipa 10 leh hmeichhia 5) a ni a, TrueNAT Laboratory a test mipa 1 leh RAgT hmanga swab sample test 495 (mipa 358 leh hmeichhia 137) zingah COVID-19 positive hmuh chhuah thar an awm lo. Tun dinhmunah Mizoramah Covid-19 positive mi 4,435 awm tawhin dam tawh zat chu 4,416 an ni a, tunah hian enkawl mek 9 an awm a, hetih lai hian Covid-19 vanga thi 10 an awm bawk a. Mizorama Covid-19 vei tihdam zat (recovery rate) chu 99.57% a ni mek. March 8,2021 tlai khan Mizoramah Covid-19 enkawl mek 6 awmin hei hi hripuiin min chenchilh hnua a vei an tlem lai ber a ni a, hetih hun laia Covid-19 vei tihdam zat (recovery rate) chu 99.64% a ni.