ZALEN June 8, 2025 : Tun hnaia khawvel hmun hrang hranga Covid-19 hri leng thar lehah Mizoramah pawh hri kai thar hi mi 2 (pahnih) hmuh chhuah an ni a, Zoram Medical College & Hospital, Falkawnah enkawl an niin dam taka chhuah tir ve ve an ni tawh.

Health department thawktute sawi danin tun hnaia India ram hmun thenkhata Covid-19 Variant JN.1, XFG leh LF.7.9 positive case hmuhchhuah a nih leh chungchangah mipuite lo chi-ai lo tûrin sawrkar chuan a ngen a, tûn dinhmunah Covid-19 hri kaite hi na lutuk an awm loh avângin in lamah enkawl an ni tlângpui a. Covid-19 hrilêng chhui hna hi Integrated Disease Surveillance Programme (IDSP) leh Indian Council of Medical Research (ICMR) kaltlangin National Surveillance System chuan chhum lo chat lovin a la kalpui reng a ni.

ZALEN-in Health department thawktute hnen atanga thu a dawn danin tun hnaia Covid-19 hri kaite hi state pawn atanga lo lut ni lovin Mizoram chhunga awm te an ni a, an chanchin hi chhui mek a niin an dinhmun pawh a tha niin an sawi. Mizoramin Covid-19 positive kan neih hnuhnun ber chu October 2024 kha a ni a, kum kal ta 2024 chhûnga Mizoramin Covid-19 cases a neih zawng zawng chu mi 73 an ni a, nunna chân an awm lo a ni. 

Chhinchhiah danin Mizoramah Covid-19 hri kai nia rinhleh mi 19,97,521 test tawh an niin an zinga mi 2,39,635 chuan hri an kai tih finfiah a ni a. Heng zinga mi 734 chu vanduaithlak takin an thi a, dam taka chhuah tir mi 2,38,901 an awm bawk. Kum 2021 a Delta variant a lo chhuah khan thi an tam ber a, mi 538 zet kum khat chhungin an thi a. Kum 2022 khan mi 180 an thi a, hri a len tan kum 2020 leh a reh kum 2023 kumte khan mi 8 ve ve an thi a ni.