R.Zomawia

Covid-19 thawh hnihna tia a kan hriat mek hian tunah hian chak takin India ram a tuam hlup hlup mai. He hripui rawn vung leh mek hi nikum 2020 atang khan khawvel hi a sawp hneh hle a, India ram pawhin a tuar a, keini Mizoramah pawh kan nunphung zawng zawng a danglam vek a nih kha. Kum kal ta-a India rama hri kai hmuh chhuah tam ber thla chu September, 2020 kha a ni. Nuaih 26 chuang hmuh chhuah a ni. October, 2020 atang khan kiam lam a pan ve tial tial a, mipui pawh tlem tlemin kan zalen zel a, February 2021 ah chuan India ram puma hri kai hmuh chhuah thar kha an tlem ta hle a ni. Hetia kan tlak hniam mek lai hian punlam erawh kan pan tual tual a, Mizoram pawh kan tla hniam hman a, kan nun dan phungah pawh hlauhna kan nei lem tawh lo, kan zalen ta hle a ni. Kum a lo thar a, March, 2021 a rawn inher chhuak a, Ajay Bhalla, Union Home Secretary chuan ralkhel dar a rawn vaw ri tan ta. Covid-19 thununna dan thar a lo chhuak a, state/UT thenkhatin hri vei enfiahna atan RT-PCT an hman tlem thu leh hmang tam tura hriattirna chhuah a ni. Tunah chuan Mizoram pawh kan ralkhel ta. Covid-19 laka himna pakhat an sawi reng chu kut tuia silfai zin tur, hmai (hmui leh hnar) tuam that hi a ni. Hnaih lutuka indin hnaih loh tur tih hi chu zawm a hlawh em em lo.

Kut silfai reng: Hei hi a tangkai viau niin a lang. Kan kut khan khawi khawi emaw kan khawih reng thin a, sahbawn nena sil reng theih tluk a awm lo. Kan kut hi hrite awlsam taka a kai zung zung lohna turin damdawi hmangin kan kut kan kap thin. Hei pawh hi a tha hle. Mithiam ten a tha tia an sawi hi chu thuawih taka kan tih mai hi a tha a ni. Tunlaiah phei chuan kan hriat angin ni tin mai hri kai thar hmuh chhuah hi kan tam ta hle a. Kan tam chho tulh tulh dawn nge? tih erawh a hriat lo va. Eng pawh chu nise, kut silfai tur chuan a hmasa berin tui kan mamawh em em a ni tih hi a lang chiang em em a ni.

Hripui hi kan hlau tak tak em?: Hripuiin tlemin min han kiamsan a, hri erawh-in min la chhuahsan chuang lo. Pung thut thei a ni tih kan hria, fimkhur ngai tih pawh kan hria. Mahse, mipui chet vel dan han thlir vang vangin kan hlauh dan hi kan hlau tak tak lo niin a lang. Social distancing kan ti reng a. In din hnaih loh tur kan ti reng bawk a, hei phei hi chu zawm hlawh loh pawl tak a ni awm e. He dan bawhchhiat avanga an chawitir hi chu a tlem ngawt ang tih a rin theih. Hmai tuam loh erawh awlsam takin an in chawitir zung zung lawi si. Dan ken kawh pawh hi a rual khai thei tak tak bik lo a ni ber e. Heti khawpa kan zalen a, kan hlau lo emaw tih lai si hian veng khatah tute emaw an lo positive a, kan tih leh em em lawi a, an inkhung hrang a, kan en dan a dang vek a. Positive awmna phei chu hmun thenkhatah phei chuan uchuak takin kan han tih a, eng emaw sawisel tur zawng char char pawl lah bo lo.  Fimkhur peih lawi si lo, positive an awm a, hlau leh em em si kan nih chhung chuan he hri hian awlsam takin min bawh ang. Sawrkar dan zawm a, thuawih hi kan tih tur a ni.

Tui harsatna: Hripuiin kan in chhung khur a rawn lut a, nunphung zawng zawng a buai vek. He natna hri hi chuti lutuk a han na em em pawh a ni lo. Natna lang chhuak kan tih lah hi hritlang angten a rawn lang a, hritlang khawsikte hi chu tu pawhin kan lo tawrh vek a ni. A natna lam ai mahin ‘positive’ han tih tawh hi chuan kan meng phawk hru ta tawh mai a. A chheh vel boruak rit lutuk mai hi a hahthlak lai ber chu a ni. Hetiang a nih karah hian Aizawl khawpui chu tui harsatnain min han tuam hlup hlup mai hi zawng a hahthlak lam hret chu a ni. Khawvel changkang zel tiin kan changkan zia kan sawi hlup hlup a; mahse, hmasawnna lam hi zawng chak takin kan la kal thei lo zawng anih ber hi. Ram hmasawn, changkang tih pawh hi kan sawi ngam dawn em ni? State khawpui berah tui harsat avangin tuikhur tui awm chhun chhun kan chawi tluk tluk hlawm a, tui kang nghak sawi tur pawh hriat tur a awm nawk a ni. Veng hrang hrangah tui harsatna hian min tuam hneh hle a nih tak hi. Hetih lai hian a enkawltu department lam chuan theih tawp an chhuah thu an sawi ve reng a, tun hnai deuhah phei chuan tui harsat thu leh duhthusam mi tin pek theih an nih loh thu an rawn sawi leh ta zel si. Kan ram mihring hi kan la pung zel dawn, kan khawpui ber pawh mihring kan tam zel dawn, hei hi chu a chiang em em a ni. Hemi hre ran chung hian thuneitute hian hmalam thui tak an thlir thiam a ngai. Chhuanlam ni awm taka mihring kan tam zel avangin Aizawl tui peknain min zo ta lo tia an rawn sawi ta mai hi hma thlir an va nei thui lo ve? tih mai tur a ni. Heng zawng zawng hi chu hriat sa ngei tura ngaih a ni. Tun ai hian nasa takin  mihring kan la pung zel dawn a ni. Hei tak hi kan hruaitute hian thlir pha rawh se. Kum tin sum sawi chhuah pawh a tam thin. Hmasawnna project hrang hrang a chhuak ur ur reng a ni lawm ni??

Tui harsatna mawlh hi sukiang rawh se: Tuikhur awm chhun tete nghaka tui kang min nghahtir hi a zahthlak hle a ni. Mi tin hian tui hi chu kan ren tlangpui thin. Tui ren tur tia sawi tluk tluk pawh a ngai chuang lo. Sawrkar hian tui harsatna hi sutkian tum se. Tui hi chhung tin mamawh a ni. Mi tin mamawh ngawih ngawih a ni tih hria a, a chak thei ang bera hma lak hi an tih tur a ni. Thil dang zawng zawng aiin tui harsat hi a hreawm ber emaw tih tur hial a ni a. Tuna kan hripui leng mek lah hian tui min mamawh tir nasa em em a ni. Tui harsatna karah engtin nge zing deuha kut kan sil theih ang. Covid-19 a ni emaw ni lo emaw tui harsa lo turin thuneitute hian tan han la zual teh se.