Aizawl: Mizorama Covid-19 hri leng mek chu eng natna ber/natna hrik (variant) nge a nih tih hre turin kar kalta khan sample 100 vel phai lamah thawn tum chu kar leh lam hian thawn tum a ni.

ZALEN in IDSP hotu Dr. Pachuau Lalmalsawma a biakna ah sample hi uluk lehzuala tih a ngaih avang leh ZMC lam an la buai avangin remchang hmasa ah thawn an tum ta zawk niin a sawi. 

Tunhnaia Covid-19 natna hrik thar Delta Variant B.1.617.2 hmuh a ni chu mak an ti lemlo nia sawiin, "Tunhnaiah hian inkaidarh a awl em em mai a, chuvangin hetiang variant hi a awm kan lo beisei sa a ni a, mak kan ti lem lo a ni," a ti. 

RT-PCR Result sample hi National Institute of Biomedical Genomics (NIBMG), Kalyani, West Bengal thawn thin an ni a. March ni 27ah vawi 2-na thawn niin sample 218 thawn zingah Delta variant 4 hmuhchhuah a ni.

Dr.  Sawma sawi danin NIBMG hi Mizoram West Bengal, Jharkhand leh hmarchhak bial ten an intawm avangin test a muang thin hle a, "India ramah hetiang natna hmuh chhuahna laboratory hi 10 emaw chauh a awm a, chuvangin sample kan thawn te pawh hi an test zung zung thei lo a ni," a ti bawk.