Covid-19: Tualchhung 66.74% leh kaina hriat loh 31.92%-ah chho

Admin - May 09, 2021

Inkhuahkhirh chhungin mi 2487 in hripui kai

Aizawl: Inkhuah khirh/lockdown puan (20th April) a nih atanga chhutin nimin thleng khan Covid-19 kai thar mi 2,487 an awm tawh a, an zinga 1,660 chu tualchhunga inkai darh niin kaina chin hriat loh (community transmission) chu 31.92% niin mi 530 an tling a, san lam a pan a ni. Pawn atanga lo pu lut case 827 a awm bawk a, sample lak zat atanga chhutin 4.91% in hri an kai bawk.

Data lakkhawm hi ni 19 chhung a ni a, put luh aiin tualchhunga inkai darh a tam zawk zel bakah san lam a pan zel a, khaikhawmin 66.74% a tling a. April 20-24 inkar khan 63.85% niin April 25-May 1-ah 58.35% a ni thung a, May 2-8 chhungin 73.29% a ni.

Ram pawn atanga lo lut khaikhawm chu 33.25% a ni thung a,  April 20-24-ah 36.14%, April 25-May 1 ah 41.14%, May 2-8 chhungin 26.70%-ah a tlahniam a ni.

Tualchhunga inkaidarh atanga chhutin community transmission (kaina hriat loh) kar thum khaikhawm chu 31.92% a tling a. Inkharkhip puan a nih kar April 20th to 24th-ah 37.60% niin 25th to 1st May inkarah 24.79%-ah tlahniamin May 2-8 nimin thleng chhutin 34.27% ah a chho leh hman a ni.

Hri kai thar khaikhawm chu 4.91% niin inkhuahkhirh puan kar April 20-24-ah 3.28% niin April 25-May 1 ah 4.57% niin May 2-8 inkarah 6.43% a ni bawk a ni.    

Damlo chhuah tir 949 awmin 38.15% a ni a, sample (RagT & RT-PCR) 50588 test hman a ni bawk. 

Share now