Aizawl: Mizorama Covid-19 vanga nunna chân an awm hnuah Zirtawpni kalta (4.6.2021) kha hripui vanga ni khat thil thua thi an tam ber tum a ni a, mi panga in nunna an chan a ni.

Zirtawpni zan dar 12 khan Lalremsiama (44), Sairang chu Covid-19 vangin ZMC-ah a thi a, May 25 khan Covid-19 positive a ni tih hriat a ni. May 30 khan ZMC-ah admit a ni a, amah hi zunthlum nei sa a ni.

Zirtawpni zing dar 9:55 khan Lengpui Airport Security Anil Kumar Rai (55), CRPF, Zemabawk chu Covid-19 vangin ZMC-ah a thi a, Anil Kumar Rai hian May 5 khan hri a kai tih hriat chhuah niin hemi ni vek hian ZMC-ah admit a ni.

Zirtawpni zan dar 7:10 khan K. Lalchhanhimi (69), Saron Veng, Aizawl chu Covid-19 vangin ZMC-ah a thi a. May ni 23 khan hri a kai tih hriat chhuah a ni a, hemi ni vek hian ZMC-ah admit a ni. 

Zirtawpni zan dar 9:30 khan B. Lallawmzuali (27), Ramhlun South, Aizawl chu Covid-19 vangin ZMC-ah a thi a. May 19 khan hri a kai tih hriat chhuah a ni a, May 20 khan ZMC-ah admit a ni a. B. Lallawmzuali hian nau hram tawh tak paiin, a hun hmaa nau a vei tak avangin May 22 khan a nun chhan nan a nau chu zai chhuah a ni a, naute hi chuan Covid hri a kai lo hlauh.

Zirtawpni vek zan dar 10:20 khan Hmingthanzuala (34), Dawrpui, Aizawl chu Covid-19 vangin ZMC-ah a thi a. May 19 khan hri a kai tih hriat chhuah a ni a, May 25 khan ZMC-ah admit a ni.