India sportsperson ropui zinga chhiar hmaih tawh loh tur Milkha Singh chu kum 91 mi niin a chenna khawpui  Chandigarh-ah COVID-19 vangin a thi. 

"The Flying Sikh" tia hming lem an phuah sak Milkha hian a vanglaiin Asian Games-ah gold medal pali lai India tan a hawn tawh a, a hmingthan pui ber erawh 1960 Rome Olympic-a 400m a pali-na a ni phak kha a ni awm e. Hemi tum hian meter 250 an tlan zo tawh tihah Milkha hian hma ala hruai a, tlan muang chho tial tialin mi pathum laiin an rawn lehpel a, patumna ni tura rawn lehpel tupa hian 0.1 second-a thlen khalhin Olympic medal a awrh loh phah a ni. A kum leha an interview-naah Milkha pawhin a ui thu sawiin, “Ka chhungte thih hnua ka thil tawn duhawm loh ber,” a ti hial. 

Milkha hian thawk lama harsatna a neih vangin tun thla tir khan Post Graduate Institute of Medical Education & Research (PGIMER),  Chandigarh-ah dah luh a ni a, Pathianni kalta khan kum 85 mi niin a nupui Nirmal Kaur, India volleyball captain hlui pawh COVID-19 vang hian alo thi tawh bawk a ni. 

May ni 19 khan Milkha hian coronavirus a kai tih hmuhchhuah a ni a, corona hri hi an awmpuinu atanga a kai chhawn a ni.        

An chhungkaw zinga COVID-19 kai hmasa ber a ni bawk a, ni reilote hnuah 'COVID pneumonia' vangin Milkha chu Mohali's Fortis Hospital, ICU-ah dah luh a ni.  

Milkha hi Indian Army niin 1956 khan Melbourne Olympic-ah 200m leh 400m-ah India ram aiawhin a inlan a, kum 2 hnu 1958-ah 200m leh 400m-ah National Games record a siam. Hemi kum vek hian Asian Games-ah gold medal pahnih a awrh a ni. Commonwealth Games-ah gold a awrh bawk.

Kum 2013 khan a hringnun behchhanin Bhaag Milkha Bhaag (Run Milkha Run) film tih chhuah niin 1959 khan  chawimawina sang Padma Shri hlan a ni bawk.