Aizawl February 6, 2023: Dr. James LT Thanga, Associate Proffessor, Department of Economics, MZU chuan COVID hripui hunlaia Mizoram pawisa dawn tur anga sawi, hmuh loh zawng zawng chu hmu mah ila hman theih vek a nih loh thu leh hloh anga sawi tûr a nih loh thu a sawi. 

Mizoram Pradesh Congress Committee chuan vawiin khan Assembly Budget Session neih tûr atana inbuatsaihna, Government Budget zirhona Congress Bhawan-ah an buatsaih a, he hunah hian Dr. James LT Thanga chuan Party mite zawhna chhangin, "COVID hripui hunlaia Mizoram pawisa dawn tur anga sawi kan hmuh loh zawng zawng hi hmu mah ila kan hman theih vek a ni lo. A hman theihna erawh thlan bik a awm, duh ang anga Mizoram sorkarin a lo hman ngawt theih a ni lo a, hmu tam eng ang mah ila hman vek theih loh a nih avangin kan hloh anga sawi tûr a ni lo," a ti.

James-a chuan Budget zirhona hunah hian Mizoram Finance chungchanga hriattur a sawi a, Revenue Deficit leh Fiscal Deficit a sân tawh chuan Treasury khar ngam mai pawh a Kristian zia zawk niin a sawi. Mipuite'n chîk zawka Mizoram Budget lo zirchian a, hma kan sawn zel dan tûr ngaihtuah turin kalkhawmte a chah bawk.