Aizawl: Health Minister hova mithiamte thukhawm chuan Covid-19 hri kai, an taksaa natna lang chhuak lem lo leh natna langchhuak nasa lote chu enkawl an nih atanga ni 7-10 naah khawsik an neih tawh loh chuan enkawlna hmun atangin test kher lova chhuah tir nise, in lamah uluk taka inchik chungin nunphung pangngai zawhtir tawh nise tiin thutlukna an siam.    

Zirtawpni khan Health Minister Dr. R. Lalthangliana hovin SAD Conference Hall, MINECO-ah July ni 13, 2021-a Mizoram daktawr thiam rualte, inrawnkhawmna Joint Consultation Meeting an neiha COVID-19 hri kaite enkawlna hmun atanga chhuahtir hun leh chhuahtir dan tur chungchanga rawtna an siamte sawiho a ni.

Joint Consultation Meeting aiawh a meeting a tel te chuan Mizoram a COVID-19 hri kaite zingah, symptom nei tawh lo leh symptom nei mang lo te, rei tak tak khung reng hian anmahni ah nasa takin rilru leh hriselna a nghawng tel thei tih an sawi a. Covid-19 hi hri chhuak thar anih vangin anihphung chiang taka zir chhoh zel a ni a, a tir lama kan hmuh dan leh hriat dante pawh khawvel ram hrang hrangah mi thiamten an zir chiang zel a, a ziarang an hriat chian belh zel avangin hri kaite enkawl dan leh enkawlna hmuna chhuahtir dante pawh an thlak danglam a ni. 

World Health Organisation (WHO), United States Centers for Disease Control and Prevention (U.S,CDC) leh Korea Centers for Disease Control and Prevention (Korea CDC) leh ram dang tam takin May thla khan scientific evidence an neih tawh atangin Covid-19 hri kaite enkawlna hmun atanga chhuah tir dan kalphung an thlak a, hemi hnu lawk hian Indian Council of Medical Research (ICMR) pawh in an tidanglam ve bawk tih an sawi a. He kalphung thar hi khawvel ram hrang hrang bakah India ram state zingah Mizoram tih loh chuan an hman vek tawh thu an sawi a ni.