Aizawl: Chief Secretary leh Chairman, State Executive Committee ni bawk Dr. Renu Sharma hova meeting chuan Mizoram pumah 24.01.2022 atanga ni 31.01.2022 zanlai dar 12:00 thleng ‘COVID-19 No Tolerance Week’ hman nise an ti.

COVID-19 hri darh zel tur ven nan Mizoram sawrkar chuan January ni 8- 31, 2022 thlenga hman turin DM&R Department Order hmasa dated 07.01.2022 hmangin inkaihhruaina thuchhuah a lo siam tawh a. Hri kai hi an pun chhoh mek zel avangin, hri leng zel tur ven nan leh hri inkaidarh zel a lo ziaawm theih nan leh ‘Covid Appropriate Behaviour (CAB)’ khauh taka kenkawh a nih theih nan ‘COVID-19 No Tolerance Drive’ hi neih leh an rel a ni.

COVID-19 No Tolerance Week chhung hian DDMA zawng zawng, VLTF/LLTF, Head of Department/ Head of Office te chu khauh taka CAB kengkawh tur a hriattir an ni a. Police Headquarters/ District SP ten CAB khauh taka kengkawh turin Police duty-na tur hmun bikte siamin, hmun hrang hrang fang kualtu tur an ruat ang a. Information & Public Relations Department pawh media hrang hrang hmangin CAB tha taka zawm a pawimawhzia uar taka thehdarh tura hriattir an ni bawk.