Aizawl; Mizoram Health department bungraw pawimawh RAgT test kid 2,00,000 phur lirthei leh oxygen phur lirthei te chu Mizoram rawn lut thei lo turin Assam lam in an dang.

Silchar Mizoram House a Deputy Resident Commissioner (DRC) S. Kaptluanga hnen atanga ZALEN thudawn danin, Assam lam in Mizoram mamawh lakluhna kawngpui ber an dan chah mek ah, Covid kaihhnawih bungraw pawimawh phur te chu lirthei tangkhang zingah an tel a, Mizoram lut tur oxygen phur lirthei 1109, Delhi atanga lokal chu  Zirtawp zan khan Silchar Mizoram house compound luhpui tawh niin, nimin lam khan ramri a duty CRPF venna hnuaiah Mizoram luhpui tum a ni a, he thu ziahlai hian kaltlangpui theih a nih leh nih loh hriat hman a ni lo.

Hei bakah hian tangkhang zinga tel RAgT test kid 1,00,000 phur lirthei chu Silchar a TCI express kudam ah dahthat ni bawkin, test kid 1,00,000 dang pawh Gauhati ah a la tangkhang mek bawk.

DRC sawi danin, Silchar Mizoram house ah khualzin mi 25 leh oil phur lirthei 2 tangkhang an awm mek a, khualzin tangkhang te hi Mizoram house a awmsa te bakah house pawn lam a thleng, fimkhur thil a Mizoram house a lutte an ni. Boruak awm dan sawithiam a har thu leh tun dinhmunah chuan thil tha lo thleng thei a awm rih lo ni a alan thu DRC chuan a sawi.

Silchar Branch YMA hruaitute pawhin boruak an thlithlai reng tih ZALEN hrilhin, kawngpui dan chah mekah hnamdang te an inlungrual lo ni a an hriat thu leh economic blockade chu sumdawng lian ho in an thlawp lo ni a alan thu an sawi.