Footballer ropui Cristiano Ronaldo chuan field pawnah pawh mi bik a nih zia a pho lang leh ta a, mihring piang tawh zinga Instagram-a follower maktaduai 300 nei tling hmasa ber a ni. Ronaldo hian June 18, 2021 (Zirtawpni) khan record hi a siam a, 200 million follower nei hmasa ber record a lo siam tawh bawk - record a siam chho zel a nih pawhin a mak lo ang. 

Ronaldo ropuia
Euro 2020 khelh mekah Ronaldo hian press conference-ah Coca-Cola an lo chhawp chu dawhkan atangin a dah thla a, hei vang ringawt hian Coca-Cola company hlutna hi $tld 4 vel zetin a tla hniam nghal niin an sawi - mi namai lo tak chu ava ni chiang em! 
Kum 36 mi Portuguese star hi tunlai thlalaite ngaihsan rawn a ni a, Twitter, Facebook leh Instagram lamah follower a ngah em em vek. Instagram-ah bik hian tun hnai kum thum kal ta chhung vel khan nasa takin a invawrh a, ‘Queen of Instagram’ an tih hial Ariana Grande pawh rawn lehpelin tunah chuan khawvela follower maktaduai 300 nei thei hmasa ber a rawn ni ta a ni. 

Top 10-te chu...
Cristiano Ronaldo hi wrestling legend Dwayne ‘The Rock’ Johnson chuan a hnaih ber a, an inkar erawh a zau viau. Ariana Grande, Kylie Jenner leh Selena Gomez te chu follower ngah zual panga zingah an lang a, Kim Kardashian leh Lionel Messi te chu follower maktaduai 200 chuang nei zingah an tel bawk. 

Top 10-ah hian zaithiam lar chuai thei lo Beyoncé leh YouTube hmanga rawn lar chhuak Justin Biebier  leh American model chhe lo Kendall Jenner te an lang bawk. 
Hriatreng tur chu heng milarte hian follower an ngah satliah lo a, sum lakluh nan an hmang. Post vawi khat an siam hian maktaduai tel an hlawh zel a, India hmarchhak kil khawra chengte nen chuan kan boruak ‘hap’ a la inthlau 
deuh a ni.