Aizawl July 18, 2022 : MJA Lunglei District leh Lunglei-a Tlawmngai pawl hrang hrang ten vawiin khan Lunglei district chhunga inbiak pawhna lam (Tele Communication) chhe lutuk chung chang an sawi ho a, customer te hnena service tha zawk te purin hmalak ni se an ti. 

Lunglei Press Club-a kalkhawmte hian service tha lo chu Lunglei mai ni lo, a chheh vel khaw hrang hrang ten inbiak pawhna kawnga harsatna an tawh mek dan te an sawi a, Lungleia Tlawmngai Pawl hrang hrang YMA Sub Hqrs. Lunglei, Lunglei Dist. Consumers Association leh Mizo Zirlai Pawl, Hqrs. Lunglei bakah MSU Regional Hqrs. Lunglei aiawhte pawhin Inbiakpawhna kawnga Service Provider hrang hrang Airtel, Jio, BSNL-te dinhmun leh a that loh avanga hmalakna lo awm tawh hrang hrang an sawi lang bawk a ni.

MJA leh Tlawmngai pawl hrang hrang kal khawmte hian thuchhuah intawm an siam nghal a, an thu chhuaha an tarlan danin tunlaia Lunglei khawpui leh a chhehvela inbiak pawhna (Tele Communication) tha lo lutuk chu lungawithlak loh an ti a. Service Provider hrang hrang ten mipuite hnena an inzawrh ang ngeiin an Customer te hnenah tun aia Service tha zawk pe chhuak se la, an pe chuak lo a nih chuan chak zawk leh na zawka hma lak ni rawh se an ti, a ni.