Ni 2.6.2023 (Zirtawpni) zan dar 7:30-a Central YMA Executive Committee meeting chuan, Manipur tualchhung buaina vanga harsatna tawk, nunau mangang Mizorama sahimna zawnga rawn raltlante chu Central YMA Hall hi Transit Camp-ah buatsaih nise a tiin a rel. An len loh pawhin Branch YMA thenkhat chu inring turin a ti bawk.

Raltlan mi engemawzatin Mizoram rawn lut tawhin, an la rawn luh belh zel a. Chhung leh khat belh tur nei lo, baihvai taka lo thlengte tan sawrkar-in ruahmanna mumal a siam fel hma chu Central YMA Hall  chu Transit Camp-ah buatsaih nise a ti a. A lo dawnsawn kawngah  mawhphurtu tur CEC member atangin a ruat nghal a, heng Mobile Number 9862162361, 8132841290- ah te hian in report theih a ni ang.

Raltlan dawnsawn kawngah Central YMA Hall a leng lo tan Aizawl khawpui chhung Branch YMA thenkhatte pawh a tul anga lo inring turin Central YMA chuan a ngen a ni. Central YMA chuan Manipur buaina hi a reh thuai theih nan leh boruak muanawm a thlen vat a duh hle a, Mizoram sawrkar pawh raltlante dawnsawn kawngah tun aia chak zawka hma la turin a ngen bawk a ni.