Central YMA hnuaia Information & Publicity Sub-Committee chuan film tawi insiam siak an buatsaih dawn a, lawmman tha tak a awm dawn. He film tawi insiam siak hi LBS Suzuki ten an sponsor dawn a, thupui atan 'Ram leh Hnam Humhalh' (Zirna/thiamna hmanga ram leh hnam humhalh) tih chu thlan a ni. 

LBS Suzuki Inter Branch Short Film Competition 2024-a tel tumte chu May 30 ral hmain in report tur a ni a, film submit theih hun chhung hi July 31, 2024 thleng a ni ang. Film siam nan hian eng camera pawh hman theih a ni a, phone camera pawh pawm a ni. Hetih rual hian video quality hi 1080 P aia resolution hniam a ni tur a ni lo thung. A duh a piang tel theih a ni a, Branch pakhat atangin film pakhat aia tam theh luh theih a ni lo thung.

Intihsiaka film thehluhte hi Central YMA property a ni nghal dawn a, hmundangah upload phal a ni lo ang. Main sponsor (LBS Suzuki) te video clip chu film tirah leh a tawpah dah tel vek tur a ni a, sponsor dang emaw sumdawnna thil video clip dang dah tel phal a ni lo. Film hi minute 15 aiin a rei tur a ni lo a, background music telh duhte chuan mi siamsa/awmsa an hmang tur a ni lo bawk. YouTube atanga download turte pawhin music royalty free chauh an hmang tur a ni.

Film-ah hian meizu lai tihlan a nih dawn chuan warning tarlan tur a ni a, naupang en atana him a ni tur a ni bawk. Mi pakhatin script pakhat aia tam ziah a thiang lo a, Mizo tawng dik hman hram tur a ni. 

Lawmman

LBS Suzuki Inter Branch Short Film Competition 2024-ah hian lawmman tha tak a awm dawn a, pakhatna hnenah Rs. 1,00,000/- (nuai khat) hlan a ni ang. Pahnihna dawn tur pawh Rs. 80,000/- a la ni a, pathumna hnenah Rs. 50,000/- hlan ani bawk ang. Top 3 bakah hian top 7 te hnenah Rs. 10,000/- theuh hlan a ni bawk ang. 

Mimal lawman tha tak a awm dawn bawk a, Best Actor, Best Actress, Best Scriptwriter leh Best Director thlan a ni ang. Heng mimal awmman te hian pawisa fai Rs. 5,000/- bakah momento hlan an ni ang. 

Lawmman 

1st Prize - Rs. 1,00,000/- + Citation

2nd Prize - Rs. 80,000/- + Citation

3rd Prize - Rs. 50,000/- + Citation

Top 7 - Rs. 10,000/- + Citation