ZALEN, Mar. 30, 2026: Kum 1980 leh 90 chhova Mizo khawtlang nun leh politic inlumlet tar lanna Mizo comic lar tak, Sudden Muanga ziaktu, Lalsangzuala’n a ziakna hmanrua leh a bungraw hlui dangte chu Mizoram State Museum-a dah turin Central YMA kutah hlan a ni.

A comic-a Laisaizawk inti thin, Lalsangzuala bungraw hlui leh Sudden Muanga comic a ziah thinna hmanrua te, a bu hlui eng emaw zatte hi Lamka Branch YMA, Manipur hruaituten Thawhtanni khan Central YMA kutah hlanin anni hian hun remchangah state museum-ah an hlan leh dawn a ni.

Sudden Muanga comic hmasa ber hi Lalsangzuala hian March, 1977 khan a tichhuak a, bu tam tak ziakin (a zat chiah hriat a ni lo) a hun laia Mizote nunphung leh Mizoram politic bakah sakhuana thlengin a tar lang thin a. Mite ngaihhlut a hlawh a, tun thlengin a hre phate lung tilenga ngaihven a la ni reng.

Hla phuah leh zai thiam, Zira Hnamte chuan ‘Sudden Muanga’ tih hla a siam a, sak hlawh tak pawh a ni a. Kum 2016 khan ‘Sudden Muang­a: Hmunkhawhar City’ tih chu film-in tihchhuah a ni bawk.

A ziaktu, Lalsangzuala hi hun rei tak zunthlum avanga enkawl a nih hnuah June 15, 2016 khan kum 65 mi niin Shija Hospital & Research Institute, Imphal, Manipur-ah a thi a ni.