May 2, 2024; Central YMA Vice President Prof. Lalnuntluanga'n Aizawl khawpui chhungah hnamdang dawr a tam thu leh a nei tu hnamdang, a hming tumtu erawh Mizo ni si an thathnem thu a sawi.

Republic Veng Branch YMA chuan April ni 30, 2024 zan khan YMA Kumpuan "Ram leh hnam humhalh" hawnna hun an hmang a, Central YMA Vice President Prof. Lalnuntluanga chuan a hawng a ni.

Thusawiin Central YMA Vice President chuan, In hmun lo ram hralh leh lei chungchangah Mizoram chhungah hnamdang ten dikna an nei loh thu leh chanvo an neih thu a sawi a, sumdawnna chungchangah pawh tribal ni lo tan phalna a neih theih loh tih a sawi. "Tuna Mizoram dinhmuna chuan a taka neitu hnamdang ni si Mizo sumdawng kan thahnem ta hle mai," tiin, "In hmun hralh chungchangah pawh a lei tu Mizo ni si a taka neitu hnamdang ni ta an thahnem hle," a ti.

Hetiang ang hnamdang kawppui thin tute hi hnam phatsan tu an ni tih sawi bawkin, "Aizawl khawpui chhungah hnamdang dawr a tam em em a, a nei tu hnamdang, a hming tumtu erawh Mizo ni si an thahnem hle a ni," a ti bawk.

Prof. Lalnuntluanga sawi danin, CYMA in Aizawl khawpui chhung cement leh iron rod dawr a zirchiannaah pawh za a sawmkua (90 percent) zet chu a hming tumtu Mizo ni si, a hlawkna tel tak tak tu hnamdang an ni.