DOWNLOAD OUR APP

Read latest news on your phone
app-store

Czech Republic player Patrik Schick

Jun 26, 2021

Patrik Schick hi Bundesliga club lar, Bayer Leverkusen-a khel lai a ni

Football khawvela inelna lian, major tournament an tih zinga mi, European Championship khelh meka striker hriat hlawh thar ni mek, Czech Republic striker palian tak, goal thun thei bawk si, Patrik Schick hi Bundesliga club lar, Bayer Leverkusen-a khel lai a ni.

January 24, 1996-a an ram khawpui, Prague-a piang, 6 ft 3 in laia sang ni bawk, palian thelh thawlh tak, Schick hi Prague khawpuia innghat, an club lian ber zinga mi, Sparta Prague-in an chhar chhuah a ni.

Kum 11 mi chauh a nih laiin an hmu fuh a, an enkawl zui ta a. Sparta tan hian May 3, 2014 khan top-flight-ah a vawi khat nan a inlan phak ta hial a, 3–1 in Teplice an hneh lo nghe nghe.

Sparta hi hemi season hian tual chhung inelna pahnihah an champion  nghe nghe a; mahse, Schick hi a la naupan avangin intihsiakna pahnihah hian vawi li chauh a inlan phak thung a, hei vang hian 2015-16 season khan loan-in Bohemians 1905 lamah an kaltir ta a. Bohemians tan hian vawi 27 a inlan a, goal riat lai a thun ta a ni.

A club ngaiah let tawh lovin June, 2016 khan Sampdoria chuan Italy-ah an seng lut ta a. Italy-a a season khatnaah hian league-ah vawi 32 inlanin goal 11 a thun a, inkhel vawi 14-ah bul tanin minite 137 dan zela goal thun ang a ni.

Sampdoria-ah hian contract ziah belh duh lova chhuah a rilruk laiin June, 2017 khan Italian club lian, Juventus chuan an dawr a; mahse, vawi hnih ngawt medical test paltlang zo lovin an lak loh phah.

Schick hian August thlaah Italian club lian dang, AS Roma chu loan-in a zawm ta zawk a. An lak luh lai hian an duh hle a, hmabak nei eng ber pawlah an chhal a; mahse, right wing emaw, left up front lamah an khelhtir thin a, goal pawh a thun tam vak lo reng a, vawi 58 a inlanah goal riat chauh a thun.

September, 2019-ah German club vantlang tak, RB Leipzig chuan a ngheta lei nghal theih turin loan-in an la ta a. Hetah chuan a chetha ta hle a, Timo Werner nen inkawpin league-a vawi 28 a inlanah goal 10 a thun a, Bundesliga-ah pathumna hial nihpuiin Uefa Champions League-ah semifinal a thlenpui bawk.

September, 2020-ah Bayer Leverkusen chuan kum nga daih contract ziahpuiin an la lut leh a. Tunah hian tifuh an inti chho tan mek tawh a ni.

Share now