Mizoram Food & Drugs Control Programme hnuaia thawktu Drugs Controller te chuan Aizawl khawpui chhunga damdawi dawr hrang hrang atangin dan loa damdawi hralhchhuak an awm thin tih sawiin, sorkar kum kal mek 2013-2014 chhungin 2013 - 2014 chhung hian danlo anga damdawi hralhchhuak leh dan zawm thalo damdawi dawr 33 license tihtawpsak an ni tawh a, show cause notice pek dawr 76 awm tawhin, dawr 6 te chu an lakah court thubuai siamsak an ni tawh niin an sawi bawk. Hetianga damdawi zawrhna dawr heti zat mai, dan zawm lo hmuhchhuah an ni hi a pawi hle a, heng dan zawm loh avanga an permit hial cancel sakte te ram leh hnam pawi an khawih tia lo sawi tawkte pawh awm sela thil dik lo a nih kher lo ang. Damdawi zuar tur hian danin a phut angte zawm a ngai a, permit pek an nih hma daihin intiamna an nei a, chu an intiamna te chu an zah tur a ni. Damdawi (Drugs) zawrh phalna license hi, Dan bawhchhiatna remchanga hman sual theih a nih avang hian, license pechhuak tute pawh an fimkhur lehzual a pawimawh hle ang. Politics lama thil tithei, thuneitu tute emaw hmanga sorkar hnathawkte chung tlak ching an awm a nih phei chuan, chutiang mite chu pek loh a himin a rinawm. Politician-te pawh an fimkhur a tul lehzual. Thuneitu an nihna remchanga hmanga awlsam taka damdawi zawrh phalna license inpek hi a him lo a, 'Political Appointment-a tute emaw zirtirtu atana lak/dah' nen a danglam tehchiam lo a, ram leh hnam kal zel tur atan, sorkar tan thil pawi tak thlen thei a ni tih hriat reng a tul ang. Ruihhlo tia sawi langsar tak tak, damdawi kheh an tih mai, Pseudoephedrine te, No.4 leh a dangte Excise ten an man thawm hriat tur a awm reng a, heng piah lamah hian, langsar lem lovah, damdawi chi hrang hrang, damdawi dawr atanga lei chhuah hi eng zat nge awm ang tih hi chhut tham tak a tling. Thalai pawh la ni pha meuh lo, tleirawl leh rawlthar, high school kal mek zingah damdawi hmansual hi a hluar viaua sawi a ni lehnghal a, chuvangin, damdawi dawr siamtu/neitute hian sumdawng an nih piah lamah mipui rawngbawltu pawimawh tak an ni tih an inhriat reng a pawimawh a ni. Dan phal chin baka damdawi zawrh a awm leh awm loh te, damdawi thi tawh zawrh a awm em tihte a khat tawka enfiah reng a pawimawh hle a, hemi kawngah hian thawktu an indaih a tul bawk ang. Tun dinhmunah damdawi dawr enfiahtu Drugs Controller lam an indaih tawk lo a nih chuan, sorkarin thawktu a dah belh thuai a tul tihna a ni mai. Mizo thalaite tamtak nun leh taksa tichhetu damdawi hmansual a awm lohna tur hian sorkar, department, tlawmngai pawl te an tawk mai lova, damdawi zuartute leh damdawi zawrh phalna license petute hian thui tak mawh an phur tih inhre thar leh teh se.