Rohmingthanga Ralte
Assistant Professor
Dept. of Mizo, Govt. Aizawl North College

Favang (autumn) hun hi Mizoram hunpui pali zinga hun nuam ber anga ngaih leh chhal thin a ni a. Mizote lunglenna pawh he hunah hian a thar zual nasa thin. Pi pu chena an lo hrilh fak pawh ‘favang’ hun hi a ni. Kum tluana hah taka an hna thawh leh rim taka an lo thawhnate hmawr bawk dawn ta a. Mizorama hun mawi leh nuam ber a thlen lai ngeiin, a rah seng tur nghakin an awm ta, an hlim em em a, nuam pawh an ti thin reng a ni. Chu chu Damhauhva pawh khan hmuh hmaih miah lovin, mawi em emin hlaah a chawi ta reng a. A hla pakhat, ‘Thal favang kawl eng leh turnipui khi’ tihah chuan a lunglenna chu khuarel thil, thilsiam dang hmangin mawi em em maiin a puang chhuak a:

Thal favang kawl eng leh turnipui hi,
Lawm an tam e, lelthang zai mawiten zun zai lo sa;
Lungleng chuang leltepa’n lenbuang zar a awi e,
Thlang kawrnu leng nen sen nau ang kan tap e,
Sen nau ang kan tap e. (1-5)

a han ti a. A hla tlar tin maiah hian khuarel thil leh thilsiam dangte chu mawi takin an inzep chiat vek mai a. A ni, khuain that lam a pan a, favang hun an lo thlen meuh chuan mihringte mai ni lo, nungchate chenin nuam an tiin, favang ni eng mawi tak mai chu ‘lelthang’ (lelte) te chuan mawi tak maiin, zaiin an lo awi a. ‘Lelte’ (thereng chi khat) phei chu a lungleng zual bik emaw tih mai turin, uar zual takin an hram fawn hlerh hlerh mai thin a. Chutah, amah anga lung leng ve niawm ang maiin ‘kawrnu’ (thereng chi khat) nen phei chuan nausen ang maiin, lunglenna avang chuan tap dun hlep hlep ang maiin a inchawi a. Favang nawm dan chu kan kiang vela awm nungchate hmangin a puang a, chiapchate khawsak leh chet dan chuan a lung a dum tih hi a hriat ngawih ngawih mai a ni.

A hla chang hnihnaah chuan pangpar leh vul thei chi zawng zawng hmangin favang hun nawm dan leh hlimawm dan a rawn zaipui leh a; romei chenin a hmaih lo. Favang ni eng mawi hnuaiah chuan hawi vel ila; par thei chi, pangpar leh thing par thei chi hrang hrang chu an lo par vul siau mai si. Romei lah chu hawina lam a piangah lung tileng tawk lekin a zam kal reih zel mai a. Thal romei a nih hun thlengin Zoram mawina chu a puang nawn awn awn zel mai si.

Khawchhak lama ramngaw hring tha tak tak te pawh chu romei chuan a bawh chiai mai a. Amah pawh chu romei anga inchantirin, fartuah kung, mawi taka lo par sen vawt vawt maite chu, romei te nena zem ho angin a inchantir a, a lunglenna erawh chuan rilru leh ngaihtuahna chu a tizing riai bawk si.

Hawi vel ila par tin an vul siau ve,
Chatuan romei pi pu zunleng a zam zo daiah;
Tukram lentuah kai chiai e, chhaktiang daiah,
Tuahpui vau kan zem, thinlai a zing riai e,
Thinlai a zing riai e. (5-10)

Damhauhva hi khuarel (nature) nen hian an inhnaih zual bikin, khuarel thilte a ngaina hle tih a hla atangin hai chi rual a ni lo a. Amah paw’n heti hian a sawi nghe nghe a. “Heng pangpar mawi tak tak te nen hian kan chengza a, kan hmuh phak mai dai bulah mawi takin a par a, cheng za, awm zaah ka inngai a; chuvangin, ‘kan zem’ tiin ka phuah” (Lalthangliana 132) a ti phei hi chuan khuarel thilte nen an inkungkaihna thukzia a tar lang chiang viau awm a ni. Zem tih hi he hla phuahtu hian a duh viau a ni ang, a fapa hmingah pawh Mizo hminga tlanglawn lem lo tak Lalzema tih a sa hial!

He hla a phuah dan, C. Lalhmuaka, Khawbung High School-a Headmaster hna thawk tawh hnena a sawi dan phei chuan:

He hla ka phuah lai hian he khawvelah hian ka awm lo a, pangpar mawi em ema an vul chukna khawvel dangah ka va cheng a, sava anga thlawkin ka inhria a, ka hawina lam apiangah pangpar mawi em emin a lang a, sava hram te chuan leilung mawina an puang a; chhawkhlei parte hi mita kan hmuh ang hi a ni lo va, thlaraua hmuh chhawkhlei chu a par mawi bik a, thiltihtheihna pawh a ngah bik a. . . (133-134).

He ta a tawngkam hman hi han chhuizau deuh chuan khawvelin a ngaihsan rawn, hal phuah thiam John Keats-an, a hla ‘Ode to Grecian urn’-a ril em em mai a lo sawi, “Heard melodies are sweet, but those unheard are sweeter” (benga hriat theih hla mawite ai chuan, thinlung ram atanga hriat thei chauh hla mawite hi, an mawi zawk a ni!) a tih te nen khan, hleiten an thil thlir leh hmuh dan a dang mawlh lo. Ni, khawvel thil kan hmuh leh hriat theih (reality) te ai chuan, kan rilru leh suangtuah rama (imagination) kan thil hmuh leh hriatte hi a famkimin, a mawiin a ropui zawng reng a sin.

Chang hnihna hi han sawizau belh teh ang. Damhauhva lunglenna kha a chen mekna hunah a tawp mai lo a. A ngaihtuahna pawh a chenpui mek mihringteah chauh a kal tawp hek lo. A hun hman mek lai atangin hun kal tawh, hun liam ta te a thlir let vawng vawng zel tih a hla atangin kan hmu fo a. Hman lai pi pute hunah te a zuk cheng let vang vang fo zel mai a ni.

Khawchhak lam khi min thlahtu pi leh pute thlang tlakna kawng, an inbenbelna hmasa a nih avangin, pi leh pute sulhnu hlui hmuh tur a tam em em mai a. Khawchhak pa ni ta chu, Damhauhva pawhin chung pi pu sulhnute chu a fang nasain, a hmu tam tih a hriat theih a. A hlaa romei a hman dan pawh hi a satliah lo hle. Pi pute hun lai ata romei lo zam tawh thin chuan, rala, kian bo ni a nei ngai lo tih a hre chiang a. ‘Chatuan romei pi pu zunleng a zam zo daiah’.

Khawchhak tlangdung hi la fang lo tan chuan fan ngei ngei chi a ni. A boruakah khian pi pute thlarau kha a la cham emaw tih mai turin, hriatthiam si loh hian, hman lai ngaihna, lunglennain min zin hnan chiai zel thei nia maw le! Lurh tlang, romeiin a bawm chiai reng an hmuh chuan ‘chatuan romei’ an tisam et mai thiamte hian a phuahtu themthiamna a tilang fiah tha hle.

“Tuahpui vau kan zem thinlai a zing riai e” tih lai hi mi thenkhat chuan “a zem” tiin an lo sa thin a ni awm e. He hla hi mahni tana phuah (personal/subjective poetry) a nihna hi an hrethiam lo tih a chiang hle. Mahni tana hla phuah a nih dan chu he hla chang tawp ber thleng hian kan hmu a. Khuarel thilte nen a inchawi kawpna hla a ni a. Tin, khuarel thil te nen inang khata leh, a indah chungnun bik lohzia a tichiang lehzual a sin. A phuahtuin a sawi dan han dah tel ila:

“Mi tam takin ‘kan’ tih aiah ‘a’ tiin an lo sa a, a dik lo. Mi dang ka phuahna a ni lova, keimahni ka insawina a ni a, ‘kan zem’ tiin ka phuah a, ‘a zem’ tia an sak chuan a dik thei lo a, ka phuah dan pawh a ni hek lo. Hemi thu hi sawi darh zau zel ang che” (133), tiin Pu Sangthuama hnenah Damhauhva khan a lo sawi tawh thu chu ‘Thu leh hla, October 1978, phek 1-2’ chhuakah khan Pu Sangthuama hian a lo ziak tawh nghe nghe a ni.

Damhauhva te khan poetry zir dan hmang leh then hran dante an hre ve si se lo ang. Mahse, ‘keima tan ka phuah’ a ti hian, he hla hi a bul atanga a tawp thleng hian subjective poetry tha tak a nihzia a tichiang nawn leh a. A zirna mual atang chuan poetry hi ze hrang pahniha then phawk a ni a, ‘mahni tan/mahni tel vena’ (personal) leh ‘mi dang tan, mahni tel ve lohna’ (impersonal) anga phuah a ni thin. A bak dang ze hran, mahni leh mi dang tana phuah pawlh nuai, phuah kawp ang chu a awm ngai lem lo. Lemchan (drama) anga Tragedy leh Comedy emaw Trage-comedy leh Come-tragedy emaw anga, ze hrang nuai ang hi; poetry lam ziarang a ni ve lo! Genre chu thuhran ni se!

Damhauhva ngaihtuahna khan a hawl kim hle a, a suangtuahna khan a fang zauva, a ngaihtuahna khan a thlir thui hle mai bawk a. Nungchate leh leia thil to par tin reng vul siau te chuan favang mawina a la tifamkim tawk lo cheuin a hria a ni ang chu?

Chung lam, van lam an thlir chho leh a, a chang thumnaah chuan khuarel mawina chu mihringte tan pawh mawina siamtu a nihzia te, favang huna ni tla mawi bik dan te, zan hunah a lo thlen chuan khua pawh a thiangin, thlasik kawng te pawh a lang kal ta raih mai a. Thla eng pawh chu hun dang zawng aiin a eng bik emaw tih tur a ni a. Chung thilsiam dangte eng mawina hnuaiah chuan hlim takin, naupang, nula leh tlangvalten lei mawina chenin hlim takin tual an chai za a.

Favang ni eng tlai tla a mawi ti u,
Zankhua a thiang, thlasik kawng chung si-ar pawl riai e;
Chhawrthlapui khian kan vangkhaw zawl a en riai e,
Tleitir, leng, naunawn, hringhniang laitual lenna,
Hringhniang laitual lenna. (11-15)

A chunga kan sawi fiahna bakah khian he lai chang hi a kil dang deuh atangin han thlir leh teh ang. He lai changah hian hman lai khawtlang nun lang iar thei hi a fiah tha hle a. Thingtlang nun hria a, tem ve chin tan phei chuan lunglenna pawh a pawchhuak hma zual bik thei ang. Thingtlang hmunah chuan khawpui te angin, êngte tha tawk ve hek lo le. Eng aiin thim, zan lamah chuan a tam zawk fo. Chuvang chuan thla eng te pawh hi a chiang zual thin a, khuangchawi thla arkaiden zanah ngat phei chuan, naupang pawnto rual atanga, upa lam leh tar thlengin, thla eng an lawm dan chu inang lo deuh mah se, an nunah eng emaw riau, thla han eng kuk chuan a thlentir chawk thin ngei awm si a?
He hla hi khuarel leh a mawina auchhuahpuina hla tha tak a nih rualin, pi pute hla phuah dan kal hmang pakhat (traditional verse form), ‘hla chang tin tlar tawp zel sak nawn’ (line repetition) la bosal lo hla a ni bawk a. A hla thukphum piah lamah, kan rochun hlate (folksong) nihphung kengtu pawimawh tak pawh a ni tel bawk a ni.
Damhauhva angin i lung a leng ve kher lo a nih pawhin, he Zo favang hi chuan i nun leh khawvel hmachhawn lai mekah, eng emaw riau a rawn ken sak leh ngei mai thei che a sin? Lungleng lo fa tan pawh nuam titakin he thil thlawn pek hun nuam malsawmna nen hian khawvel leh khuarel mawina te hi i thlir thar leh teh ang u.

Work Cited: Lalthangliana, B. Patea leh Damhauhva Hnuhma. Aizawl: Mizoram Publication Board, 2005. Print.