Aizawl: India leh Myanmar ten insumdawntawnna hmun atana an pawm Zokhawtharah chuan dan ang takin sumdawnna kalpui a la ni lo a, India ram atangin leitha leh Myanmar atangin kuhva rah te a lut tam ber.
Zalen palai thudawn danin India ram atang hian leitha chu a lut chho tam lawr lak a, hei bakah hian damdawi chi hrang hrang leh sam lem te chu lut chho tam zual a ni. Myanmar atang hian kuhva a lo lut tam ber a, kuhva bakah hian sikret, nitin eichawp leh insakna bungrua te a lo lut bawk.
Zokhawthar hi dan ang taka insumdawntawnna hmuna puan ni tawh mah se a pangngai ang tak takin sumdawnna hi kalpui a la ni lo a, gate kaltlang lova bungraw kal pawh thahnem tak a awm nia thudawn a ni.
Bungruate hi Tiau lei ah motor a phurh phal a nih loh avangin India ram Zokhawthar leh Myanmar lama Zokhawmawi te inremna angin bungrua te hi mihring hmanga phurhkai thin a ni a, India bungruate hi Zokhawthar lamin Tiau ral lehlam, Myanmar ramah an phur lut a, hetiang deuh chiah hian Myanmar lam bungruate chu Zokhawmawi mipui ten India ramah an rawn thlen ve bawk.
Zokhawthar kaltlanga insumdawntawnna atan hian item 90 remtih (declare) a ni a; mahse, thlai leh ei tur lakluh te endikna tur hmun hnai ber chu Imphal (Manipur) ah a awm a. Tunah hian hetiang laboratory hi Thenzawl ah bun tum mek a ni a, thlai enfiahna tur hmun hi a hlat em avangin enfiah lovin eng emaw zat a lo lut a, laboratory hi Zokhawthar a din a nih loh chuan tunhnu zelah pawh harsatna a awm thei dawn niin an sawi.
Zokhawthara insumdawntawnna hi a mi nawlpuiin an chhawr tangkai tawk lo hle a, a chhawr tangkaitu chu mi tlem tê, India ram laili lama mi hausa leh Myanmar ram chhunga mi hausa te chauh niin an sawi a. Nitin Champhai kawngah hian truck lian chi 50 chuang kal ziah anga chhut a ni a, hei hian kawng a ti chhe hle bawk.
Tun dinhmunah India pawisa Re. 1 leh Myanmar pawisa Kyat 19.80 a intluk mek a ni.